[A:49]grags pa'i rdo rje 'dzin pa chen po de la sras gnyis byung ba'i che ba la chos kyi rje sa skya paNDi ta chen po nyid/ rje btsun sku mched sogs rgya bod kyi mkhas grub du ma'i zhabs la gtugs/ gzhi tshul khrims rnam par dag pa dang ldan cing / rang dang gzhan gyi grub pa'i mtha' rgya mtsho lta bu'i pha rol tu son pas lha dang bcas pa'i 'jig rten thams cad kyi gtsug gi rgyan dam par gyur te/ snyan pa'i grags pa sa chen po'i khyon thams cad khyab par mdzad pas hor rgyal po go dan gyis spyan drangs te zhabs kyi padma la btud/ mu stegs kyi ston pa 'phrog byed dga' bo la sogs pa lung dang rigs pa'i sgo nas tshar bcad de yang dag pa'i lam la sbyar/ bla ma dang yi dam gyi lha du ma'i zhal gzigs shing ting nge 'dzin gyi sgo bsam gyis mi khyab pa thugs rgyud la 'khrungs shing / grub tshogs gnyis dang / lho dmar gnyis la sogs pa slob ma'i tshogs bsam gyis mi khyab pa bskrun par mdzad do/ /gnyis pa slob dpon chen po bzang tsha bsod nams rgyal mtshan la/ sras lcam sring brgyad 'khrungs pa'i che ba 'gro ba'i mgon po chos rgyal 'phags pa/ chung ngu nas lo tsA ba ska ba dpal brtsegs dang sa ston ri pa la sogs par 'khrungs pa'i sngon gyi gnas rjes su dran pa dang / gzhi tshul khrims rnam par dag pas rgyud gtams shing / chos rje pa nyid dang / ldong / gnyan/ grub/ tshor/ stag /mchims/ chag lo/ rog /zhang / mngon pa ba la sogs pa la gtugs te mdo sngags kyi chos bod du 'gyur ro cog thams cad gsan/ nang du yang dag pa'i ting nge 'dzin 'ba' zhig gis dus 'da'/ chos