[A:40]bcud kyi rnam pa thams cad pa 'dod dgur bsgyur ba'i gzugs kyi rnam rol du mas 'gro ba rnams rang rang gi skal ba dang 'tsham pa'i spyod pa dang / gtam gyis mtshams sbyar te mthar nges par zung 'jug rdo rje 'dzin pa chen po'i sar bkri bar mdzad pa kho na las mi 'da' ba yin la/ de dag gi nang nas kyang ches cher rab mchog phul du byung ba gtso bo'am dam par gyur pa ni/ thar 'dod rnams la ma nor ba'i lam tshul bzhin du 'doms par mdzad pa'i bshes gnyen dam pa/ de las kyang zab mo'i smin grol gyi bka' drin stsol ba'i mtshan nyid dang ldan pa'i rdo rje slob dpon gyi gzugs kyi rnam par rol pa dag yin te/ ba tsha can chu klung gi mdo las/ lnga brgya tha mar gyur pa na/ /nga nyid slob dpon gzugs 'dzin te/ /nga yin snyam du yid byos la/ /de tshe de la gus pa bskyed/ /ces dang / mkha' 'gro ma rdo rje gur gyi rgyud las/ rdo rje sems dpa' lta bu yi/ /de ltar slob dpon gzugs 'dzin te/ /sems can rjes su gzung dmigs nas/ /phal pa'i gzugs su gnas pa'o/ /zhes dang / slob dpon ston par gyur pa ni/ /sangs rgyas rnams kyis phyag mdzad pa/ /bdag cag rnams kyi pha dang ma/ /'di nyid yid la bsam par bya/ /zhes dang / gang phyir ye shes rdo rje ni/ /brnyes pas myur du thob par 'gyur/ /de phyir slob dpon drung gshegs te/ /de bzhin gshegs rnams phyag 'dzad do/ /zhes sogs kyis mtshon pa'i mdo rgyud bstan bcos dri ma med pa ji snyed pa las lan cig ma yin par nan du bka' stsal pa dag gis legs par grub pa yin no/ /de lta bu'i rdo rje slob dpon dag gi yon