[A:༣༩] ནོར་བུ་ཆུ་ཤེལ་དྲི་མ་མེད་པ་ཚོན་སྣ་ཚོགས་པ་དང་ཕྲད་ན་དེ་དང་དེའི་ཁ་དོག་མཛེས་པ་འཛིན་པ་ཇི་ལྟ་བ་བཞིན། གདུལ་བྱ་རྣམས་ཀྱི་ཁམས་དང་བསམ་པ་དང་དབང་པོའི་རིམ་པ་དང་མཐུན་པར་སྤྲུལ་པའི་གཟུགས་ཀྱི་རྣམ་རོལ་བགྲང་བར་དཀའ་བ་ཇི་སྙེད་པ་དག་ཏུ་སྟོན་པ་ཡིན་ཏེ། མདོ་ལས། རྒྱལ་པོས་འདུལ་བ་ལ་རྒྱལ་པོ། དགེ་སྦྱོང་གིས་འདུལ་བ་ལ་དགེ་སྦྱོང༌། བྲམ་ཟེས་འདུལ་བ་ལ་བྲམ་ཟེ། དྲི་ཟས་འདུལ་བ་ལ་དྲི་ཟ་རྒན་པོའི་གཟུགས་སུ་སྤྲུལ་ཏོ། །ཞེས་དང༌། སངས་རྒྱས་མཉམ་སྦྱོར་ལས། རེས་འགའ་ཞི་ལ་རེས་འགའ་ཁྲོ། །རེས་འགའ་བགེགས་ཆེན་གདོན་མཛད་ཅིང༌། །སྐྱེ་དང་རི་བོ་ཐམས་ཅད་དོ། །ཞེས་དང༌། གུར་ལས། གང་དུ་སྣང་ནས་ཀྱང་སེམས་ཅན་གྱི་དོན་མཛད་དོ། །སོ་སོར་སྣང་ནས་ཀྱང་སེམས་ཅན་གྱི་དོན་མཛད་དོ། །ཆང་འཚོང་མ་དང༌། སྨད་འཚོང་མར་སྣང་ནས་ཀྱང་སེམས་ཅན་གྱི་དོན་མཛད་དོ། །ཞེས་གསུངས་པས་མཚོན་ནས། ཞིང་ཁམས་ལ་ལར་དཀྱིལ་འཁོར་འཁོར་ལོའི་སྣང་བརྙན། ལ་ལར་མཛད་པ་བཅུ་གཉིས་སྟོན་པའི་སངས་རྒྱས་དང༌། གཞན་ཡང་བྱང་ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་དང༌། མཁས་པ་པཎྜི་ཏ་དང༌། གྲུབ་པ་དང༌། རིག་པ་འཛིན་པའི་ས་ལ་གནས་པ་དང༌། ཨ་ཝ་དྷཱུ་ཏི་དང༌། བྷུ་སུ་ཀུ་དང༌། ཀུ་སཱ་ལི་དང༌། འཁོར་ལོས་སྒྱུར་བ་ལ་སོགས་པའི་རྒྱལ་པོ་དང༌། ཁམས་ཀྱི་རྒྱལ་ཕྲན་དང༌། བློན་པོ་དང༌། བྲམ་ཟེ་དང༌། དགེ་སྦྱོང་དང༌། ཁྱིམ་བདག་དང༌། ཡིད་བཞིན་གྱི་ནོར་བུ་དང༌། གྲུ་གཟིངས་དང༌། ཟམ་པ་དང༌། སྨན་དང༌། ཟས་དང༌། གོས་དང༌། རི་བོ་དང༌། བྱ་དང་རི་དྭགས་ལ་སོགས་པ་མདོར་ན་སྣོད་