[A:97]gdams pa gnang ba rnams kyang ji skad gsung ba bzhin 'grub pa sha stag byung bar snang / mdor na sku mthong ba/ gsung thos pa/ mtshan dran pa tsam gyis kyang srid zhi'i 'jigs pa mtha' dag las skyob nus pa'i dbang phyug chen por bzhugs pa yin no/ /zung gis lhag pa'i bshes gnyen phyogs kyi grangs/ bka' drin phul byung rje btsun bla ma bzhi/ /gsung ngag chu bo 'dus pa'i dam pa gsum/ /'gran zla kun bral 'dren mchog dbang po gnyis/ /gzhan yang sbas pa'i rnal 'byor 'ga' dag las/ /zab cing rgya che'i chos tshul kun nod cing / /khyad par sa skya'i rje btsun yab sras las/ /'ongs pa'i snyan brgyud bdud rtsis khyod thugs gtams/ /de ltar thos bsam rgya mtsho'i pha rol son/ /dben sa yid bzhin sman ljongs nyams dga' bar/ /gsang chen rtogs pa'i nor bu ci yang thob/ /byang phyogs grub rig 'dzin pa'i ded dpon gyur/ /bdag chen rdo rje 'chang po'i rnam thar yid 'phrog utpala'i do shal zhes bya ba las/ dben pa'i ri khrod la bzhugs nas zab mo'i nyams len gtso bor mdzad pa'i skabs te drug pa'o// //yid bzhin chu mtshor ngang mo rtsen pa bzhin/ /tshangs pa'i bu mo da dung blo mtshor rol/ /thun mong min pa'i rtogs brjod 'di smra yi/ gnas gsum DA kis gnang ba'i skabs phye zhig /dam pa'i sgyu 'phrul rol mo lha yi rnga/ /skal bzang gtsug phud can la sim pa ster/ /skye ngan log rtog kha da'i mdun sa ru/ /nam yang smra bar mi bya sa ma ya/ /zhes gnang ba nos shing gsang