[A:118]ma de'i mgo la gnam lcags kyi thog chen po mi bzad pa phab ste/ las ngan gyi sbyor ba byed pa'i lus dang phral nas sems nyid dag pa'i zhing du skad cig ma de nyid la spo bar mdzad do/ /de nas de'i 'khor du gtogs pa'i mi dang mi ma yin pa thams cad ni bsam pa ma 'grub pa'i mya ngan gyis non cing 'gyod pa dang bcas pa'i ngud mo'i sgra chen pos sa phyogs de thams cad khyab par byas so/ /de nas yongs 'dzin ces bya ba chu pho byi ba'i lo'i zla ba gsum pa la/ 'phags pa spyan ras gzigs kyi rnam 'phrul rnal 'byor byang seng yab sras rnams kyis byin gyis brlabs pa'i gnas/ dro sa dgon par phebs te don gnyer gyi grwa pa gal che ba thor ba zhig dang / rgyal chen rtse nas yum sras sogs brgya lhag tsam la gsung ngag rin po che cha lag dang bcas pa yongs su rdzogs pa gnang / gzhan yang zab pa dang rgya che ba'i chos kyi rnam grangs mtha' yas pa'i bka' drin stsal/ der bzhugs pa'i dpon slob rnams kyi zhabs tog gi mthil len smon mkhar ba drung nas chos mdzad mas bsgrubs shing / rgyal chen rtse nas sde pas kyang zur skyor gyi zhabs tog phun sum tshogs pa bsgrubs/ de ltar zla ba bcu drug gi bar nA lenda pa yon mchod/ dbus phyogs kyi sa skya pa la dad zhen yod pa'i 'gro ba mang po dang / khyad par khams phyogs nas rje nyid kyi zhal ta ba la 'ongs pa'i 'gro ba mtha' yas pa zhig rang rang gi skal pa dang 'tsham pa'i bka' drin stsal bas 'khor ba mtha' can du mdzad do/ /skabs der babs pa'i tshigs bcad ni 'di ltar ro/ /lus ni ngur smrig gos kyis klubs kyang sems ni ha la'i dug ltar gnag /