[A:119]phrag dog dug chus kun tu myos kyang ngan sngags g.yo sgyu'i las la bsgrin/ /tshul 'chos byi dor khur du khur kyang las 'bras blang dor rgyang du bor/ /bstan 'dzin chen po'i gzugs kyis bgying yang bstan pa rin chen dkrug la brtson/ /de lta'i ma rungs rdo rje'i sna ldan des/ /rong ston chen po'i bstan pa'i pad tshal bcoms/ /bstan 'dzin bung ba'i tshogs rnams nyam thag pa'i/ /dar dir smre sngags phyogs brgyar 'bod pa'i tshe/ /khyod kyi mthu stobs rdo rje'i mnga' bo che/ /skad cig nyid la sbyor sgrol cig car 'grub/ /'di na sngon med rngon pa sha wa ri/ /dpal gyi ri nas de ring khyod 'ongs sam/ /yang na sgyu ma'i sprul pa'i gdong lnga pas/ /mig 'phrul las byung glang po bsad pa ltar/ /srog mthar byas kyang sdig gis ma gos pa'i/ /gsang chen dam pa'i sgyu 'phrul 'di ngo mtshar/ /ka ye 'di na dpal ldan sa skya pa'i/ /bstan la dad pa'i skal bzang skye rgu'i tshogs/ /ma 'jigs kho bos bde bar dbugs dbyung gis/ /gsang chen bdud rtsi'i dpal la da rol cig /de skad mthon po'i gdangs kyis 'doms pa'i tshe/ /kun kyang 'jigs bral bde ba'i sman ljongs na/ /'jam dbyangs bla ma'i zhal gyi 'dzum dkar la/ /lta zhing dga' bde'i dpal gyis sim par byed/ /de yi grags pa kunda ltar dkar ba/ /khor yug ri bo'i khyon 'dir ma shong bar/ /legs ldan mtho ris gnas su phyin gyur te/ /'chi med gzhon nu kun kyang gtam du smra/ /'di dang mtshungs pa'i mkhas grub gzhan yod na/ /'di lta'i ngo mtshar gtam du gleng ba 'os/ /'di yi ba spu'i 'gran