[A:42]ba'i mkhyen brtse'i snang brnyan ni/ /rtser son mtshan ldan rdo rje 'dzin pa'i rje/ /chos kyi rgyal po dpal ldan sa skya pa'i/ /zhabs kyi padmor snying nas gus pas 'dud/ /ces brjod nas/ gong du smos pa'i rgyu mtshan de nyid kyis brjod nas/ rje btsun 'jam dpal dbyangs nyid ngur smrig 'dzin pa'i gar gyi rnam par rol pa'i bshes gnyen dam pa/ zab pa dang rgya che ba'i dam pa'i chos kyi chu klung ma lus pa gcig tu 'dus pa'i spos kyi rgya mtsho chen po/ rang rang gi skal ba dang mtsham pa'i theg pa gsum gyi char zim phyogs brgyar 'bab pa'i rdzogs ldan gyi sprin sngon gsar pa/ mthu stobs nus pa'i spar khyim rnam par g.yo bas bdud rigs glang po'i klad pa 'gems par nus pa'i seng ge ral pa can/ mkhas grub klu dbang bye bas yongs su bsten zhing blo gsal ngang pa 'du ba'i pad rdzing chen po/ snyan brgyud zab mo'i bcud len skal bzang rna ba'i dpal du ster ba'i 'chi med kyi rnga bo che/ 'phags pa'i nor bdun la rang dbang du spyod cing bstan 'dzin yongs kyi khrod na mkhas pa dang grub pa'i 'khor los sgyur ba/ lha dang bcas pa'i skye dgu thams cad kyi ral pa'i cod pan la zhabs sen padma'i lan tshar bkod pa'i 'gro ba'i mgon po rje btsun sa skya pa chen po chos kyi rgyal po blo gros rgyal mtshan dpal bzang po zhes snyan pa'i ba dan srid pa gsum na ches cher gsal ba 'di nyid rigs thams cad kyi bdag po/ dkyil 'khor thams cad kyi gtso bo/ dpal he ru ka nyid dang dbyer mi phyed par bzhugs pas/ dam pa 'di'i rnam par thar