[A:244]sku'i mkha' dbyings bsdus/ /ngo mtshar snang ba'i dga' ston ci yang bstan/ /slar yang 'khor ba ji srid gnas kyi bar/ /'gro 'di'i dpal du shar ba e ma ho/ /phal tshig sbrengs chags tho chor 'god byed po'i/ /blun rmongs dag gi snying la mi 'bab kyang / /zla dbang dge dbang dpal bo'i gzhung lugs bzhin/ /mkhas pa'i dga' ston rtogs brjod 'di smras so/ /de ltar na dpal ldan sa skya pa'i bzhed pas/ thub pa'i dbang po 'di'i bstan pa lo lnga stong gnas pa'i dbang du byas nas lo'i grangs rtsis pa na/ thub dbang chos kyi dbyings su snyoms par zhugs nas bdag nyid chen po 'di zhing gzhan du gshegs pa yan la lo gsum stong drug brgya drug cu rtsa gcig song / da lhag ma stong dang gsum brgya sum cu rtsa dgu gnas par shes par bya'o/ /da ni rtsom pa mthar phyin pa'i tshig 'ga' brjod par bya ste/ 'di na khu byug tsa ko ra dang sbrang rtsi byed pas kun nas gang ba'i pad mtshor gnyis 'thung dga' bas rtsen/ tsu ta gsar pa'i snye ma rgyas 'gram ni tsu la yi lan tshar khrod na ka dam myos pa'i glu dbyangs sgrog /dzA ti sna ma'i me tog phreng ba rgod 'dzum rtse la rkang drug ldan pa nyin bzhin rgyu ba de bzhin du/ /dam pa'i bka' drin bdud rtsis myos pas kho bo'i yid 'di dbang med bskyod nas rtogs brjod gtam 'di gsal bar bsgrags/ /de las thob pa'i dge ba gang zhig dung dang pad rtsa chu shel ltar dkar de ni srid zhis bsdus pa yi/ /dge tshogs dri med gzhan dang lhan cig ma rnams don du myur ba nyid du kun mkhyen rgya mtshor 'jug gyur cig /gsang ba'i gtam