[A:142]langs te zor gtor brdeg long med par dgra phyogs su sgyel ba dang / dam sri sgrol ba'i mtshams kyi skabs su/ nged kyi lag na rtse sag bzang po zhig yod pa des/ ltad mo ba btsun ma zhig gi lag pa star mo'i ldebs la sbyar ba'i thog tu thag sgra dang bcas phog song na'ang / zhur ma tsam yang ma byung ba ni thams cad kyis dngos su mthong ba de lags/ ril bu de ni nad gdon grib thams cad sel bar nus pa'i byin rlabs can zhig byung ba yin no/ /dad ldan slob ma'i tshogs kyis gsol btab nas/ /tshad ldan gdams pa'i go rim ji bzhin du/ /bcud ldan sman gyi sgrub pa mtha' ru phyin/ /skal ldan 'gro ba'i re ba rdzogs par byas/ /lo nyer brgyad lon pa'i glang lo dpyid/ myug tu byang gter nas gsungs pa'i phyi sgrub sman gyi bcud len zhig zhag bdun bsgrubs pa'i dus dri bzang po'ang cung zad dang 'phel che ba sogs rtags ni yid ches par byung mod/ bkra rtags thams cad legs po zhig ye ma byung bas/ de la dmigs pa'i thabs 'dra dgos pa yod na'ang grub pa zhig ma byung / lo de'i zla ba gnyis pa'i nang du bdag gi bla ma mkhan chen thams cad mkhyen pa'i zhal snga nas spyan 'dren ma zhus par phebs byung ba nas/ sa dang po la'ang mi smon pa'i dga' spro byung / da lam gzhan don spyod rgyu ye med/ khyed la chos shig bshod du yongs pa yin gsungs pa na/ dga' zhing mgu la ba spu langs/ mchi ma'ang lhug par shor/ zhabs la gtugs pa'i phyag bgyis te/ gang gnang