[A:143]zhus pas da lam 'jigs byed 'di byed gsung ba ltar 'o yug sdings mar spyan drangs/ dpal rdo rje 'jigs byed rwa lugs thun mong ma yin pa'i dbang lung man ngag bshad pa thams cad yongs su rdzogs pa dang / khyad par rwa khrid mkha' 'gro snyan brgyud nyams khrid du stsal bas bskyed rdzogs zab mo'i lam gyi gnad gsang thams cad khong du chud/ rdo rje theg pa'i gnas thams cad la klong du gyur pa zhig byung ste/ dran pas gdung sel khyab bdag ma he'i zhal/ /ngur smrig zol gyis rol pa'i pha rgod des/ /'khrul med gnad kyi lam gsang 'di bstan tshe/ /mtha' yas chos kyi rang zhal rjen par mthong / /padma dbang chen yang gsang khros pa'i dbang lung man ngag thams cad rdzogs par gnang / slar phyags phyi byas zab bur phyin/ der zhag lnga bzhugs nas thugs sgrub kyi dbang bsdus pa dang / nA ro mkha' spyod kyi byin rlabs sogs dbang lung kha cig kyang gnang / slar myur du zhag lnga tsam bzhugs te stod la byon/ de nas ring po ma lon pa na mnga' ris chos kyi rgyal po sprul sku chen po chu bo ri nas gtsang du phebs 'dug pa spyan drangs/ zla ba lnga tsam gyi bar bsnyen bkur te/ rje nyid kyi gter chos phal che ba dang tshe brtan rgyal mtshan dang ratna gling pa'i bla ma zhi drag /padma gling pa'i bla ma nor bu rgya mtsho rnams sgrub chen dang 'brel ba'i dbang lung / ma Ni bka' 'bum skye bdun sgrub chen dang 'brel ba'i dbang lung / khyad par