[A:147]bas/ phyis kyang lam zhor byung res kyi mjal snyan dar re phul byas pa yin no/ /de nas 'o yug tu phyin nas bla ma de'i dgongs rdzogs la dmigs/ sngags 'chang dbang po 'o bran rin po che'i drung gi dbu mdzad dge 'dun lnga bcu tsam la shangs pa'i phyag chen chos drug gi nyams khrid dang / gzhan gser chos lnga'i dbang lung rje de nyid las gang thob pa tshang ma dang / skya ser sum brgya tsam la dgongs pa kun 'dus kyi dbang khrid lung sogs bgyis pa las/ zhi khro'i dbang gi ye shes phab pa'i tshe dge bshes byams pa chos dbang bya ba zhig la ye shes phebs te/ skyil krung bcas bzhin du mi rnams gral la 'dug pa'i steng nas yud kyis 'ongs te 'phag pa la sogs kyang byung / bum pa/ nang mchod/ gtor ma thams cad 'du khang der ci gar bzhag pas cung zad kyang ma 'khyags shing / ne gu'i dbang zhig gi ngo sprod kyi skabs su mdun gyi nam mkha' 'ja' 'od sna lnga'i dbus na pha bla ma rtogs ldan gyi rgyal po de 'dzum ye re bzhugs nas ngas byin gyis rlabs kyi yod gsung ba'i nyams snang gsal po zhig kyang byung / slar chos lung du 'ongs nas lo so gcig lon pa'i stag lo zla ba dang po nas zla ba bzhi'i bar mtshams nges pa can gyi dge sbyor byas de rjes sde pa rin po che dbang rgyal de chos dbyings su phebs 'dug pa nas/ sde pa rin po che zhal bzhugs pa 'dis bdag la lan mang por thugs la btags/ brtse bas bskyang / byams po yang dag mdzad pa'i drin can zhig yin pas/ gsol ja zhig ma zhus na mi btub snyam mjal du