[A:177]yab sras lhan cig tu bzhugs te/ pha bla mas lugs gnyis nas gdan sa ba dge 'dun dang bcas pa la lugs gnyis kyi blang dor gyi gnas mang du gsungs/ ber thul ne ser bzang po dang / sku chos khyad du 'phags pa zhig gis gtsos pa'i gnang sbyin kyang blos mi 'khyud pa gnang zhing rab gnas kyi me tog 'thor bar mdzad pa'i tshe yang char zim bu'i rgyun lhag par babs/ rin spungs nas sde srid rin po che'i bsko 'ja' khri ston dang bcas pa khri khang nas sde pa rin po ches khri ston mang ja nas 'gyed phun sum tshogs pa dang / sde pa gnas gsar nas dang lcags stod nas kyang khri ston rgyas par sku drin gyis bskyangs shing / phyag 'tshal ston mo'ang phun sum tshogs par bsgrubs/ sbyor drug zhu ba po bla ma slob dpon drag bsdus shig gi gtsos pa'i dbang cha gnyis la dpal dus kyi 'khor lo'i sku gsung thugs yongs su rdzogs pa chos rje thams cad mkhyen pa'i bzhed pa ji lta ba zhig kyang phul te/ rgyal ba rigs brgya'i khyab bdag bla ma des/ /rgyal tshab sras kyi thu bor dbang bskur tshe/ /rgyal ba sras bcas nam mkha'i khams gang bas/ /rgyal bar gyur ces me tog bsil ma 'thor/ /mchog gi bla ma dus gsum gzigs pa des/ /zhing 'di'i bstan pa spel bar mngon dgongs shing / mthu ldan srung ma'i dbang pos bskul ba'i mthus/ /seng ge'i khri la de ring dbang bskur thob/ /snyan grags nyi 'od phyogs kun khyab pa'i tshe/ /skal ngan 'byung po'i bya rnams nyon mongs gyur/ /gzur gnas shes ldan dgyes pa'i padma las/ /legs so'i sbrang rtsi ci yang rgyas par gyur/ /der sbyor drug gi khrid