[A:216]lha so bdun ma'i dbang bzhi yongs su rdzogs pa/ de'i nyer grub kyi dbang / lha bcu gsum ma'i dbang bzhi/ de'i dbang bsdus pa/ lha gcig bum gcig gi dbang / tshe zan la brten pa'i dbang / tshe khrid thun mong dang thun mong ma yin pa'i lung dang bcas pa/ dpal thugs rje chen po padma dra ba lha zhe drug gi dbang dang / rje mi tra'i lugs kyi gsang sgrub bcu gsum ma'i byin rlabs/ rtog pa las gsungs pa'i ku ru kulle lha lnga'i dbang / rtog pa le'u lnga pa dang / de'i man ngag gi lung rnams thos/ rta mchog gi rigs/ dpal rdo rje gzhon nu lha lnga bcu rtsa gcig gi stod las byang chub sgrub pa'i dbang / rgyud dang / rje btsun sa skya pa chen po yab sras/ rje bla ma rnams kyis mdzad pa'i yi ge rnams kyi lung / yar phur gyi rdzogs rim zab mo a ti bsam gtan gling pa'i lugs kyi nyams khrid/ de'i yi ge mtha' dag gi lung / rje btsun sgrol ma lha bcu bdun ma'i dbang / sgrol ma lus dkyil lha nyer lnga'i dbang rnams thob bo/ /gnyis su med pa'i rgyud la/ dpal dus kyi 'khor lo rwa 'bro rnam pa gnyis ka'i phyag len phyogs gcig tu byas pa/ chos rje thams cad mkhyen pa'i bzhed pa'i dbang bdun/ gong ma/ gong chen dang bcas pa dang / 'bro lugs gtso che zhing / rgyud 'grel sor bzhag las rgya gzhung gi rjes su mi 'brang ba kun mkhyen jo nang pa'i lugs kyi 'jig rten dang 'jig rten las 'das pa'i dbang bcu gcig /rdo rje slob dpon bdag po chen po'i dbang / dpal sdom pa chen po lha bdun cu rtsa gnyis kyi dbang /