[A:54]bsags pa'i las ngan tsho la 'ded dgos rgyur 'dug na'ang mno bsam drag shos rjes su las/ rtab rtab la lung ma bstan re byas 'gyod kyang rgyugs thebs med pa kho na yong ba 'di spra chal la spu sud pa'i spre'u'i grogs mched rnams kyi khyad chos su 'dug pa bzhin sngar yang mang po byung mod/ des mi thub da dung yong zer ba'i mo ngag gi tshan du gda'/ lo de'i mjug la nyang stod bsam sdings nas grub thob kyi 'khor los sgyur ba lce ston paN chen rin po che sde pa nas spyan drangs/ bdag gi bla ma de la gsung chos gsan pa dang sgo bstun dgyes bzhin du phebs byung / de'ang bla ma 'di pa bod yul gyi sngags 'chang thams cad kyi dbus na nyi zla ltar gsal ba lce thams cad mkhyen pa mdo sde seng ge zhes bya ba rgyud sde brgya rtsa brgyad la mkhas shing grub pa des 'a zhwa'i pha mes zhu 'brog a mes chen po'i bla ma mdzad/ sku drin bsam gyis mi khyab pas skyabs pa nas bzung / gdung rabs dgu'i bar bla rabs mchod rabs zam ma chad par byon pa'i bla ma drin chen gyi brgyud pa zhig yin/ rje 'di nyid kyang nges par grub pa'i dbang phyug rtsod med cig lags pa ltar/ nged rang yon mchod kyi pha chos dpal phyag na rdo rje gtum po chen po lha nyer gcig gi dkyil 'khor chen por dbang bzhi yongs su rdzogs pa dang / tshe dpag med lcam lugs/ nag po chen po lha chen dpal 'bar gyi rjes gnang thun mong dang thun mong ma yin pa man ngag