[A:༡༢༦]སུ་རབ་ཏུ་བྱུང་བའི་དབུ་འཕང་བསྟོད་དོ། །དེ་ནས་རྒྱལ་བུ་གོ་དན་ལ་ཤ་བཀྲའི་ནད་བྱུང་བའི་རིམ་གྲོར། ཆབ་གཏོར་འཇམ་དཔལ་མ་མང་དུ་མཛད་པས། ལུག་ལོ་ཟླ་བ་གསུམ་པའི་ཚེས་བཅུ་གཅིག་གི་ཐོ་རངས་མནལ་ལམ་དུ་མི་ཐེང་པོ་ལུས་ལ་རྨ་དང་ཤུུ་བས་གང་བ་ཅིག་བྱུང་བ་ལ། ཁྱོད་སུ་ཡིན་ཞེས་དྲིས་པས། ང་ལ་དཔོན་ཅིག་ཡོད་པ་ན་རེ། ས་སྐྱ་པ་འབོད་ཅིང་འདུག་པས་ཁྱེད་སོང་ལ་ཅི་ཟེར་ཉོན། ང་ནི་ལུས་པོ་ན་བས་འགྲོ་མི་ནུས་པ་འདུག་ཟེར་ནས་འོངས་པ་ཡིན་ཟེར། དེ་ནས་ཆོས་རྗེ་པས་གོ་དན་གྱི་གསེར་ཡིག་པ་བཏང་ནས། ངེད་ཐག་རིང་པོ་ནས་བོས་ད་འདི་ལ་ཕན་པ་ཅིག་དགོས་པ་བྱུང་བས་ནད་འདིའི་རྒྱུ་ཅི་ཡིན། ད་ཐབས་ཅི་བྱས་ན་ཕན་ཞེས་དྲིས་པས་མི་དེ་ན་རེ། ཡུལ་ཕྱོགས་འདི་རྣམས་སུས་ཀྱང་མ་བཟུང་བའི་དུས་སུ། ངའི་དཔོན་དེས་བདག་པོ་བྱས་པ་ཡིན། དེའི་ཚེ་གོ་དན་འདི་ཤཱཀྱ་མུ་ནེ་ལ་བསོད་ནམས་བསགས་པའི་རྒྱལ་པོ་ཅིག་ཏུ་སྐྱེས། དེ་ནས་ཚེ་འཕོས་ནས་མི་ཉག་གི་རྒྱལ་པོ་གཅིག་ཏུ་སྐྱེས། རྒྱལ་པོ་དེས་ངའི་ཁང་པའི་སྟེང་དུ་མཁར་ལན་བྱས། མི་ཉག་རྒྱལ་པོ་དེས་ཀྱང་བནྡེ་རྣམས་ལངས་མཁར་ལས་བྱེད་པས་ས་གཞི་སློངས་ཟེར། བནྡེ་རྣམས་དབྱངས་འདྲ་བྱེད་པ་དང༌། རོལ་མོ་འདྲ་འཁྲོལ་བ་དང༌། གཏོར་མ་གཏོང་གིན་འདུག་སྟེ། ས་ཆོག་མི་ཤེས་པར་འདུག་པས་ས་གཞི་མ་བྱིན། དེར་རྒྱལ་པོས་མཁར་ལས་བྱས་པས་ངེད་དཔོན་གཡོག་རིས་ནོན་པ་བཞིན་སོང༌། དེ་ནས་མིའི་བསོད་ནམས་མ་ཐུབ་པར་བྱང་ངོས་འདིར་འོངས་ནས་ཡུལ་ལེགས་པར་བཟུང༌། དེར་ཡང་རྒྱལ་བུ་དེ་འོངས་ནས་ངེད་ཀྱི་སྟེང་དུ་མེ་བཏང༌། ས་བརྐོས་གཞན་ཡང་གནོད་པ་མང་དུ་བྱས། དེར་ཡང་སྡོད་ས་མ་བྱུང༌། དེ་ནས་ངའི་དཔོན་པོ་དེ་ཁྲོས་ནས་ཡུལ་ཕྱོགས་ཀྱི་ལྷ་འདྲེ་རྣམས་བསྡུས་ནས། རྒྱལ་པོ་འདིས་ང་ཡུལ་ལན་གཉིས་ཕྱུང་བས། ད་འདི་ལ་གནོད་པ་ཅིག་བྱེད་པས་ཁྱེད་