[A:༡༢༧]རྣམས་ཀྱིས་གྲོགས་གྱིས་བྱས་པས། ལྷ་འདྲེ་རྣམས་ན་རེ། རྒྱལ་པོ་འདིས་ཤཱཀྱ་མུ་ནེ་ལ་བསོད་ནམས་བསགས་པ་ཡིན་པས་འདིའི་སྟོབས་མི་ཐུབ་ཀྱིས། ཁྱོད་སྐམ་སར་མ་སྡོད་པར་ཆུ་མིག་དང༌། འདམ་རྫབ་ཡོད་སར་ཡུལ་ཟུང་ཟེར་ནས་དེར་བསྡད་པའི་དུས་སུ། རྒྱལ་པོ་དེས་རྒྱལ་པོ་སྔ་མ་ཀུན་གྱི་བནྡེ་རྣམས་ལ་རྒྱུགས་བྱིན་པའི་ཡི་གེ་བལྟས་པས་སྔར་གྱི་རྒྱུགས་ཆེས་ཟེར་ནས་ཕྲིས། དེའི་ཚེ་རྒྱལ་པོ་དེས་གསེར་གྱི་ཤཱཀྱ་མུ་ནེ་འདི་ངེས་པར་གསེར་ཡིན་ནམ། ཤིང་ངམ། རྡོ་ཡིན་བལྟ་ཟེར་ཏེ། ཞབས་ལ་གཟོང་གིས་བརྐོས་པ་དང༌། དེ་ནས་ལྷ་འདྲེ་རྣམས་ན་རེ། ད་འདིའི་བསོད་ནམས་ཀྱི་ཆ་ཉམས་པས་བར་ཆད་བྱ་བའི་དུས་ལ་བབ་ཟེར་ནས་ལྷ་འདྲེ་རྣམས་འཚོགས་པ་དང༌། འདི་བསོད་ནམས་ཅན་ཡིན་པས་གཞན་སུས་ཀྱང་བརླག་པར་མི་ནུས་པས་ན། ནང་གི་བློན་པོ་དང་རྒྱལ་པོ་ལ་ཕྲ་མ་གཞུག་ཟེར་ནས་ཕྲ་མ་བཅུག་པས། དེར་བློན་པོས་བསད། དེར་རྒྱལ་པོ་དེས་འཆི་ཁར་སྨོན་ལམ་བཏབ་སྟེ། ང་ཚེ་ཕྱི་མ་ལ་རྒྱལ་པོ་ཅིག་གི་བུར་སྐྱེས་ནས་ཁྱེད་རྣམས་ལ་གནོད་པ་སྐྱེལ་ཞིང་ཁྱེད་རྣམས་བྲན་བཞིན་དུ་ཁོལ་བར་ཤོག་ཤིག་ཅེས་སྨོན་ལམ་བཏབ་པས། ཇིམ་གྱི་རྒྱལ་པོའི་ཚ་བོར་སྐྱེས་ཏེ་གོ་དན་ཡིན། དེས་བྱང་ངོས་འདིར་འོངས་ནས་ངེད་ཀྱི་སྡོད་ས་ཆུ་དང་འདམ་རྫབ་ཀྱི་སྟེང་དུ་རྟ་རྒྱུགས། དེར་རྟ་བསད་ཁྲག་གང་བོ་སར་ངེད་ལ་ལ་ན། ལ་ལ་ཤི །ངའི་ལུས་ལ་ཡོད་པའི་སྦལ་ལྕང་འདི་རྣམས་ཀྱང་ཤི་ལ་ཁད་པ་ལ། ངའི་ལུས་ཀྱི་དྲོད་ཀྱིས་མ་ཤི་བ་ཡིན་ཟེར་ནས་ལུས་ལ་སྦལ་པ་དང༌། ལྕང་མོ་ཕྱེད་སྐམ་པ་དང་ཤི་ལ་ཁད་ཡོད་པ་ལ། དེ་གོང་གི་བནྡེ་རྣམས་ཀྱིས་གོ་དན་ལ་སྨོན་ལམ་འདྲ་འདེབས་པ་ལས། ངེད་ཀླུ་ལ་ཕན་པ་ཅི་ཡང་མ་བྱུང༌། ད་ཁྱོད་ས་སྐྱ་པས་སྨན་དང་བཟའ་རྒྱུ་བྱིན་པས་ངེད་ཀླུ་རྣམས་ལ་ཕན་པར་བྱུང༌། ང་གར་ཡང་འགྲོ་མི་ནུས་པ་ལ་ད་རེས་ཅུང་ཟད་ཕན་པ་ཡིན།