[A:༡༢༨] ད་ངའི་དཔོན་དེ་ཤི་ལ་ཁད་ཡོད་དེ་ཤི་ན་གོ་དན་ཡང་ཤི། ངའི་དཔོན་དེ་སོས་ན་གོ་དན་ཡང་སོས་པས། རིམ་གྲོ་ཡང་ཆང་ཆུང་གིས་མི་ཕན་མི་སོས་པས། ཁྱེད་ཀྱིས་ངའི་དཔོན་པོ་དང་གོ་དན་གསོ་བའི་འབད་པ་ཆེན་པོ་གྱིས། ངའི་དཔོན་པོ་སོས་ན་གོ་དན་ཡང་སོས། དེ་སོས་ན་ཁྱོད་ཀྱང་བཟང་པོར་འགྲོ་ཟེར། དེ་ནས་ཆོས་རྗེ་པའི་ཐུགས་དགོངས་ལ། ད་འདི་ལ་ཐབས་ཅི་བྱས་ན་ཕན་དྲི་སྙམ་པ་ལ། བར་ཆད་ཅུང་ཟད་ཅིག་གིས་དེ་ཡལ་སོང་ངོ་གསུངས་སོ། །དེ་ནས་རྒྱལ་པོའི་དོན་དུ་འཕགས་པ་སེང་གེ་སྒྲའི་ཆོ་ག་མཛད་པས་རྒྱལ་བུ་ནད་ལས་ཐར་བས་ཤིན་ཏུ་དད་དེ། ཐེག་པ་ཆེན་པོའི་སེམས་བསྐྱེད་ལ་སོགས་པ་ཟབ་པ་དང་རྒྱ་ཆེ་བའི་ཆོས་དུ་མ་ཞུས། མཆོད་གནས་རྣམས་ཀྱི་ཕུད་དུ་བཀུར། དེ་ནས་བཟུང་སྟེ་སྐད་རིགས་མི་གཅིག་པའི་གདུལ་བྱ་ཆོས་ལ་མི་དད་པ་རྣམས་ཆོས་ལ་དད་པར་བྱས། དད་པ་རྣམས་ཐེག་ཆེན་ལ་བཙུད། མདོར་ན་གདུལ་བྱ་དཔག་ཏུ་མེད་པ་སྨིན་ཅིང་གྲོལ་བར་མཛད་པས་བསྟན་པའི་དར་རྒྱས་ཕུལ་དུ་ཕྱིན་པར་མཛད་དོ། །དེ་ནས་བོད་དུ་བྱོན་པ་བས་བྱང་ངོས་སུ་བཞུགས་ན་སངས་རྒྱས་ཀྱི་བསྟན་པ་ལ་ཕན་ཆེ་བར་གཟིགས་ནས་དེ་ཉིད་དུ་ཐུགས་ཕབ་བོད་ཀྱི་གྲྭ་སློབ་རྣམས་ལ་གནང་སྦྱིན་དང་འབུལ་བ་ཡང་བསྐུར། ཆོས་ཀྱི་སྐྱེས་སུ་བྱང་ཆུབ་སེམས་དཔའི་ལམ་ལ་འཇུག་པའི་རིམ་པ་ཐུབ་པའི་དགོངས་པ་གསལ་བ་ཞེས་བྱ་བ་བསྐུར་ནས་ཚོགས་ཆོས་འདི་དབུས་གཙང་ཁམས་གསུམ་དུ་ངས་བཤད་པ་ཡིན་པས། ངའི་སློབ་མ་ཐམས་ཅད་ཀྱིས་ལུང་ཐོབ་པ་ཡིན་པས་ཡི་གེ་འདི་ལ་ལྟོས་ལ་ཤོད། འདི་བཞིན་དུ་ཉམས་སུ་ལོང་གསུངས་སོ། །དེ་ལྟ་བུའི་བླ་མ་རྩོད་པའི་དུས་ཀྱི་ཐམས་ཅད་མཁྱེན་པ་གཉིས་པ་དེ་དགུང་ལོ་བདུན་ཅུའི་བར་དུ་རྒྱལ་བའི་བསྟན་པ་དང༌། སེམས་ཅན་དཔག་ཏུ་མེད་པ་སྨིན་ཅིང་གྲོལ་བར་མཛད་ནས། མཐར་གཟུགས་ཀྱི་སྐུའི་བཀོད་པ་ཇི་ལྟར་བསྡུ་བའི་