[A:༡༡༩]ནས་ཀྱང་ལུང་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་རྒྱུད་ལ་འཁྲུངས་པ་ཡིན་ཏེ། ཆོས་ཀྱི་རྗེ་ཉིད་ཀྱི་གསུང་ལས་ཁོ་བོ་ཡང་གཞོན་པའི་དུས་སུ་བླ་མའི་རྣལ་འབྱོར་གྱི་བྱིན་རླབས་ཞུས་པས་ཁྱོད་ཀྱིས་སངས་རྒྱས་ཀྱི་འདུ་ཤེས་མི་སྐྱེ། ཁུ་བོའི་འདུ་ཤེས་སྐྱེ། ལུས་ལོངས་སྤྱོད་ཀྱིས་བླ་མའི་ཕྱོགས་སུ་དཀའ་ཐུབ་མི་ནུས་གསུངས་ནས་མ་གནང༌། ཕྱིས་འཆི་ལྟས་འཇིགས་པ་ཅིག་བྱུང༌། ཁམས་ཀྱང་མ་བདེ། དེའི་སྐབས་སུ་ཆོས་རྗེ་རིན་པོ་ཆེ་ལ་སྐུ་ཁམས་མ་བདེ་བ་ཞག་འགའ་བྱུང༌། དེར་ཉིན་མཚན་རྒྱུན་མི་ཆད་པར་གཉིད་དང་ཁ་ཟས་ཀྱི་འདུ་ཤེས་མ་བྱས་པར་ཞབས་ཏོག་བྱས། དེས་སྡིག་པ་ཅུང་ཟད་དག་པ་འདྲ། དེ་ན་བླ་མའི་རྣལ་འབྱོར་འདི་གནང་བས་བླ་མ་ལ་སངས་རྒྱས་ཀྱི་འདུ་ཤེས་སྐྱེས། སངས་རྒྱས་ཐམས་ཅད་ཀྱི་ངོ་བོ་འཕགས་པ་འཇམ་དཔལ་དུ་མཐོང༌། མོས་གུས་ཐུན་མོང་མ་ཡིན་པ་སྐྱེས། དེ་ཉིད་ཀྱིས་འཆི་ལྟས་ལས་གྲོལ། ཁམས་ཤིན་ཏུ་བདེ། དེ་ནས་སྒྲ། ཚད་མ། སྙན་ངག །སྡེབ་སྦྱོར། ཚིག་གི་རྒྱན། གསང་སྔགས། ཕ་རོལ་ཏུ་ཕྱིན་པ། མངོན་པ། འདུལ་བ་ལ་སོགས་པའི་ལུང་དང་རིགས་པའི་གནད་རྣམས་ཕྱིན་ཅི་མ་ལོག་པར་གཟོད་གོ །སྡེ་སྣོད་ཐམས་ཅད་ལ་མི་འཇིགས་པའི་སྤོབས་པ་ཐོབ། ལྷ་འདྲེ་མི་གསུམ་ཡང་ཐམས་ཅད་བྱམས་པར་བྱུང༌། རྒྱ་གར་གྱི་རྒྱལ་པོ་ལ་སོགས་པ་ང་རྒྱལ་ཅན་ཐམས་ཅད་ཀྱང༌། ངེད་ལ་ཆོས་ཞུ་ཟེར་ནས་རྩིས་བྱེད་པ་གཟོད་བྱུང༌། ནང་དུ་ཡང་དག་པའི་རྟོག་པ་ཅུང་ཟད་ཀྱང་སྐྱེས། དེའི་ཚེ་ཁོ་བོ་ལ་ཕན་པར་བྱ་བའི་དོན་དུ་རྟེན་འབྲེལ་འགྲིག་པར་བྱ་བའི་ཕྱིར་བསྙུང་བའི་ཚུལ་བསྟན་པ་ཡིན་གྱི་དངོས་མ་ཡིན་པར་སྣང༌། གཞན་གྱིས་ཀྱང་དེ་ལྟར་བྱས་ན་རྟེན་འབྲེལ་ཕྱིན་ཅི་མ་ལོག་པར་འགྲིག་པར་འགྱུར་བ་ཐེ་ཚོམ་མི་ཟའོ་ཞེས་འབྱུང་བ་དང༌། གཞན་ཡང་དངོས་སུ་འཇམ་པའི་དབྱངས་དང༌། མི་གཡོ་མགོན་པོ་དང༌། སྒྲོལ་མ་ལ་སོགས་པར་གཟིགས་ཤིང༌། དབུགས་དབྱུང་ནས་ཆོས་ཀྱི་སྒོ་དུ་མ་ཡང་བསྟན་ལ། དེ་ལ་བརྟེན་ནས་ཏིང་ངེ་འཛིན་