[A:460]yod/ /khong phyag bris ri mo khyad par can/ /dbu rgyab bstan bris pa'i ri mo ni/ /khong sa skya 'jam dbyangs zhal bstan nas/ /chos pha rol phyin pa'i snying po mchog /bka' zhen pa bzhi bral 'doms so lo/ /khri de na sa paN bzhugs pa'i tshe/ /chos rnying ma phur pa rtsa ba'i dum/ /phyag padmar babs tshe spro ba skyes/ /sgra rol mo bcas te spyan drangs zer/ /gnas de na bzhugs pa'i rten gyi mchog /rje 'phags pa'i gdung la 'khrungs pa yi/ /khong rgyal ba rigs lnga yod ces thos/ /yid dad mos phyag dang mchod pa phul/ /dpon zhing bzhag rdo rjer grags pa de/ /sngon bsod nams bsags pas las 'phro can/ /bod dbus gtsang sa la dbang sgyur zhes/ /rje grol mchog lung bstan thog tu babs/ /shangs mthong smon nas ru bzhi ma'i gru khar phyin/ de nas gru mkhan ral tshar ba zhig 'dug pa de na re/ 'di pa'i dkyid na gru skya g.yob shes pa e yod zer/ nged kyi rogs blo gros thogs med zer ba zhig yod pa des nged kyis shes zer/ de nas gru la phyin pas khos gru skya g.yob ma shes gru mkhan ngar langs te mi gces po bla ma dge ba'i bshes gnyen 'di 'dra bzhugs bzhin du gru skya mi shes bzhin du ngas shes shes zer ba de khyod kyi ltas ngan shes pa i yin/ ngas a shes ma shes lta'i zer ba yong / ngas shes shes de ltas ngan shes pa i yin zer nan gyis yang yang lab cing grub skya phrogs nya mo hor stag pa yin zer ba'i mi gzhon cig la sprad song ba des kyang shes po ma byung / de nas tsha bo mang thos rnam rgyal gyis byas pas a tho byung gru thongs pa lags so/ /chu chen por gru yis brgal ba'i tshe/ /