[A:103]bgrang yas/ rang 'dod skyo ngal spangs nas ci gsung bka' bzhin bsgrubs pas/ thugs rje'i byin rlabs zhugs pa sog po rgyal po'i bla ma/ mdor na lung rtogs kyi yon tan gzhan ci yang ma mchis kyang / rje bla ma'i bka' drin 'khor thabs med pa rjes su dran pas/ gar gnas su gsol ba 'debs kyin sdod pa bdag lta bus mtha' brten pa'i bu slob nam mkha'i skar phran tsam gyis bshad sgrub kyi sgo nas bstan pa rin po che nam langs kyi nyi ma shar ba ltar/ phyogs bcur rgyas par byed pa ni bsam pa'i ra ba las 'das pa yin no/ /mkhyen rab mchog tu yangs shing rgyal chen rnam thos sras kyi bka' babs pa stag lung ban dpon pa/ bstan pa stobs kyis 'dzin pa'i sbyin bdag kyang rigs brgyud cho 'brang ldan zhing stobs kyi 'khor los bsgyur ba/ skyid shod dga' ldan pa'i zhal ngo bsod nams dpal gyi mngon par mtho ba'i shun mi dbang chen po'i yum dang bdag mo/ stag lung ga se'i gdung brgyud sde pa phod mdo ba/ se chen rgyal brgyud hor rgyal po/ 'a zha rgyal brgyud rtsis gnas gsar ba/ rgya ma khri dpon gyi rgyal brgyud sde pa mkhar rtse ba/ de nas brgyud pa sde pa grub rgyal ba/ byang brgyud rgyal po rgyal chen rtse pa las gyes pa/ dpon chen rgyal ba bzang po'i brgyud pa sde pa gzhis ka ba/ mdor na skyid 'phan gyi sde dpon rigs phal cher/ snye thang / stod lung / dbur stod/ stag lung la sogs pa'i sde dpon rigs phal mo ches mchod cing bkur ba'i gnas su bzhugs pa yin cing / skal bar 'tsham pa'i bka' drin nod par byas pa yin