[A:44] de nas 'og min kyi bar du ches cher bsgrags par gyur to/ /dus de nyid nas bzung ste/ ltung ba sde lnga char gtogs dang bcas pa'i dri ma mtha' dag dang bral shing / gnyen po'i khrims nyis brgya lnga bcu rtsa gsum char gtogs dang bcas pa g.yel ba med par gces spras su mdzad pa yin no/ /phun tshogs zhing na grangs med rigs brgya'i gar/ /sku bzhi ye shes lnga ldan rgyal ba dngos/ /gcig bsdus drug pa'i sangs rgyas rdo rje 'dzin/ /khyab bdag 'khor lo'i mgon por gsol ba 'debs/ /skyabs gsum gcig bsdus bskal bzang 'gro ba'i mgon/ /brgyad khri bzhi stong zab chos kun gyi mdzod/ /smra ba'i dge 'dun 'dus pa'i mchog gyur pa/ /zla med bla ma mchog la gsol ba 'debs/ /sngon tshe 'phags pa'i gnas brtan ba kU la/ /kha ba can ljongs spyan snga tshul khrims 'bar/ /slar yang zhing 'dir ngag dbang chos kyi grags/ /bka' drin mtshungs med zhabs la gsol ba 'debs/ /'khor ba'i phun tshogs rtswa rtse'i zil pa dang / /sbrul gdug tshang tshing lta bur legs gzigs te/ /thub dbang bstan pa'i khang bzang dam par byon/ /spyan snga chos kyi rje la gsol ba 'debs/ /mtshan nyid kun ldan yongs 'dzin mchog gyur pa/ /bcu phrag gcig dang drug gi lhag pa bsten/ /zab dang rgya che'i chos tshul ma lus kun/ /legs gsan thugs su tshud la gsol ba 'debs/ /bslab gsum padmo'i mtsho chen dag na rgyu/ /theg gsum gser gyi rgyan gyis gdong mdzes shing / /thub bstan nor bu'i khur gyis ngal med pa'i/ /gnyis 'thung dge ba'i bshes der gsol ba 'debs/ /rgya chen thos pa'i pha mtha' kun dang bral/