[A:48]la kha cig ni ring mo zhig nas gcig nas gcig tu brgyud pa'i thugs zhen dang / kha cig ni dag snang lhur blang ba dang / kha cig ni chos kyi cha lag cung zad lus pa dang / 'ga' zung ni phar slob tshur slob tu gyur/ mthar ni thams cad la sangs rgyas dngos kyi thugs dad mdzad/ zla bas lhag pa'i yongs 'dzin bcu phrag gnyis/ /khyad par bka' drin che ba'i bla ma bzhi/ /gcig pu 'gran zla bral ba'i tshar pa rje/ /mnyes pa gsum gyi sgo nas bsten pa'i mthus/ /rgyal sras rgyal ba'i chos 'tshol rtag tu ngu/ /nor bzang nor gyi snying po chos bsgrub ltar/ /mkhas spyod mkhas pa'i bshes gnyen mang bsten nas/ /zab lam zab mo'i bdud rtsi'i gter du gyur/ /nyi shu rtsa gcig dam pa'i yongs 'dzin bsten/ /rgyud sde rgya mtsho'i tshig don thugs su tshud/ /gangs can mkhas pa kun gyi rtse mor son/ /dang por rgya chen thos bsam mdzad dus lags/ /zhes so/ /bzhi pa de ltar thos bsam gyis sgro 'dogs bcad pa'i don de rnams rtse gcig tu nyams su bzhes pas/ thugs rgyud la lung rtogs kyi yon tan bsam gyis mi khyab pa 'khrungs te snying po'i don blangs pa'i tshul ni/ spyir rgyal ba'i gsung rab rab 'byams thams cad dang / khyad par rgyud sde rin po che dri ma med pa'i rnam grangs bsam gyis mi khyab pa byung tshul/ de dag gi dgongs pa 'phags yul gyi 'brel byed tshad ldan du mas bkral tshul/ gangs can gyi ljongs su 'gyur tshul/ rje btsun sa skya pa yab sras sogs/ bod kyi mkhas grub dag gi bzhed srol so so ma 'dres pa yongs su rdzogs pa/ phyogs re tsam ma yin par lam gyi srol yongs su rdzogs pa'i gnad thams cad lung rigs kyi lam nas