[A:52]dang chos skyong gi bzlas pa rnams thun gyi dus tshang ma ma tshar na/ phebs tshe chibs kha dang / bzhugs tshe thugs long gang byung du gnang lags/ de yang bdag nyid chen po 'di ni mtshan mo zhi lhag zung 'jug gi rnal 'byor la g.yel ba mi mnga' zhing / mtho dman thams cad la lhag par byams shing / sems can gzhan la gnod pa'i las cung zad kyang mi mdzad/ gzhan la mtho 'tshams pa dang / phrag dog gi rnam pa'ang cung zad kyang mi mnga'/ pha rol gzhan gyis phrag dog byed mi byung kyang phal cher rmi lam sgyu ma lta bur dgongs pa'i 'dzin pa dang ya nga bag tsha cung zad kyang mi mdzad/ gzhan gyis gnod pa chen po bskyal kyang de la gnod lan gyi dgongs pa tsam yang mi mdzad/ rnyed bkur dang che thabs kyi rtsol sgrub mi mdzad/ thugs dam las ma g.yos kyang sgo yab kyi me tog sogs thugs g.yeng che ba'i dus bla ma gong ma'i phyag srol du 'dug pas gcog ni mi bde 'dug gsung / gzhan sun snang che ba tsam mdzad/ thugs dam gyi shugs kyis mi mang po'i dkyil khyad par grib can gyi sa sogs la phebs kyang sku grib dang / gsung 'cham/ 'go nad tshan chen sogs gang yang mi yong / dam tshig mi gtsang ba'i mi'i za ma gsol ba dang 'phrad pa sogs byung na/ sku bsnyel ba dang / rmugs pa sogs yong / gzhan gang gis kyang skyon med/ mnal kyang srod la srab po ma bri tsam byung na mdzad/ ma byung na srod khyer nas mnal kyang gtan nas mi yong zhing / bskyed rdzogs bzlas pa dang bcas pa dang / khyad par 'od gsal kho nar bzhugs pa ma gtogs dran