[A:140]med pa'i chos brgyad kyi kun nas bslangs pa'i gzhan mgo skor ba'i ban ling lta bu ma yin par/ brgyud pa'i phyag len rnam par dag pa las byung ba'i spros pa'i phyag len kyang du ma zhig mdzad la/ de thams cad kyi dbang lung phyag 'khrid/ dbyangs rol gar 'chams/ mtha' na mchod pa bshom tshul tshun la rje nyid kyi zhal bkod/ dka' ba'i gnas rnams su bslab bya mthar phyin pa mdzad pa sogs ding sang gi mkhas par rlom pa'i snang tshul dang ye mi 'dra ba'i mdzad pa blo'i rwa ba las 'das pa yin la/ 'di'i skabs su char ha cang ches na 'then pa dang / dkon pa'i tshe sgrub mchod tshugs 'phral 'bab pa dang / gzhan yang me tog gi char kha ba ltar 'bab pa dang / sna tshogs pa'i 'ja' sprin gyis nam mkha'i khams kun khyab pa sogs/ der 'dus kyi mig ldan kun gyis mthun snang du grub pa de yin no/ /slar yang zla ba drug pa dang bdun pa la/ rdo rje 'chang sgo rum pa chen po dang / tshar chen chos kyi rgyal po gnyis kyi dus kyi mchod pa chen po la yang / dpal kye rdo rje dang / dpal dus kyi 'khor lo gtso bor gyur pa'i rnal 'byor bla med kyi dkyil 'khor chen po lnga tsam gyi rdul tshon gyi dkyil 'khor zhag bdun phrag re re'i bar du sgrub cing mchod pa/ chos skyong gi gtor sgrub sogs ches cher rgyas par mdzad pa rnams sbrul lo nas bzung ste/ byi lo dus kyi zing log chen po ma byung gi bar gzabs rgyas su mdzad do/ /de nas sprul pa'i sku mkhyen brtse'i zhabs kyi gdung sob pa dang / mtha' yas pa'i 'gro ba rnams