[A:141]myong grol ril bu'i sgo nas thar lam la 'god par bzhed nas/ sbrul lo nyid nas bzung ste lo drug gi bar du bo dong e'i kun ra dang / zhong zhong ma dang / ram sdings ma sogs gnas chen rnams su 'phags pa thugs rje chen po byang gter lugs 'gro ba kun sgrol gyi steng nas sgrub chen gyi cho ga zhag bdun phrag re'i bar smin rgyas su mdzad pas gzhung nas bshad pa ltar gyi phun sum tshogs pa'i ltas phal cher byung zhing lhag par ril bu rnams dril bu du mar 'phel ba dang / sems can sdig can du ma tshe 'pho ba'i dus khar chud cing myong ba rnams kyang / gnas ngan gyi sdug bsngal las grol ba'i rtags mngon sum du mthong ba dang / sgrub pa'i skabs su lha rdzas kyi me tog bsil ma'i char kha ba ltar 'bab pa dang / kha dog sna tshogs pa'i 'ja'i gur khyim dang / pa tra ris lta bus nam mkha'i khams kun khyab pa dang / mi'i 'jig rten du sngon yod ma myong ba lta bu'i lha rdzas kyi dri ngad zhim pos phyogs kun khyab pa sogs ngo mtshar ba'i ltas du ma dang bcas legs par grol ba'i mthar/ der 'dus kyi skal ldan brgya phrag du ma la sgrub dbang dang ril bu'i dbang la sogs pa mdzad pa'i skabs su rje nyid yang dag pa'i snang ba du ma gzigs pa la brten thugs dam nyams bzhes pa dang / 'dus pa rnams kyang byin rlabs kyi zil rgyas pas bde chen gyi ye shes nyams su myong ba sogs mdor na skye bo du ma la thar pa'i sa bon skyon med du btab nas dag pa'i sar bkri bar mdzad do/ /de nas 'jigs bral phyogs las