[A:143] sgrol ma sogs 'dod lha mang po'i rjes gnang / de dag gi yi ge mang po'i lung / shangs chos chen po lnga'i dbang 'khrid cha tshang ba/ gsang sngags rnying ma'i phyogs kyi yang dbang / lung byin rlabs/ bka' gtad sogs chos kyi 'phrin las bsam gyis mi khyab pas dus 'da' bar mdzad do/ /de dag gi skabs su bstan pa spyi dang / bstan pa'i sbyin bdag gnas gsar pa'i sku rim sogs la gur zhal gyi gtor chen mgon po g.yul bzlog drug cu pa sogs gtor bzlog mang po zhi rgyas kyi sbyin sreg mang po sogs bstan pa spyi dang / bye brag gi rgyun yun ring du gnas par dgongs pa kho na nyin mtshan ngal med du mdzad do/ /de nas khyi lo zla ba dang po'i tshes bco lnga'i dus bzang gi nyin tshugs par mdzad nas/ chos rje bsod nams tshul khrims pa/ chos rje srin mo dang / bdag gsum la gsung ngag rin po che slob bshad thun mong ma yin pa cha lag yongs su tshang ba dang bcas pa zla ba dgu'i bar du smin rgyas su stsal/ mdor na rdo rje 'chang tshar pa yab sras kyi snyan brgyud kyi bstan pa nyin mo ltar mdzad cing / gsung ngag snyan brgyud slob bshad chos tshul ding sang gi bar du ma nyams par bzhugs pa ni rje 'di kho na'i bka' drin du nges so/ /de ltar gong du cung zad smos pa ltar gsar rnying mtha' dag gi dbang lung / 'khrid/ bshad pa/ man ngag /zhal gdams sogs thams cad la dpe mkhyud dang / sla chos dang / gzu lum du ma song bar phyag 'khrid zhal shes su bcas pas/ ma 'khrul ba/ ma chad pa/ ma lhag pa/ gsal zhing go bde ba/ 'brel chags shing skabs