[A:164]mo'i rnam par sprul pa de nyid khab tu bzhes pa gnang ba'i sras su bdag spun gsum byung ba'i che ba bdag nyid yin pas/ skyon med rdo rje theg pa'i dal 'byor gyi lus 'di nyid thob par gyur to/ /rdo rje'i lus bzang skyon med gru gzings 'di/ /ded dpon mkhas pa brtson 'grus lcag gis bskul/ /rab med gya gyu 'khor ba'i mtsho las sgrol/ /zag med bde chen nor bu'i gling du phyin/ /mtha' yas tshogs gnyis dpal las 'khrungs pa'i sku/ /bgrang yas 'gro kun phan bde bskrun slad du/ /bsam yas gdul bya'i bung ba skyong ba'i phyir/ /dpag yas nyams dga'i skyed tshal nga re skyid/ /de yang ma ma de nyid kyi dri ma med pa'i mngal du bdag bltams pa nas bzung / yum la sku lus bzhin mdog sngar bas dang ba dang sku sngar bas yang zhing / bde ba'i tshad thub pa zhig dang / thugs dam 'jam sdud bzang gsum/ bla ma mchod chog /gtor ma brgya rtsa/ rdzogs chen gyi smon lam stobs chen/ smon lam bzhi skor/ le bdun gsol 'debs la sogs pa'i thugs dam 'chag med mdzad pa shin tu spro zhing bogs kyang che ba gegs kyi rnam pa skad cig tsam yang med par zla dgu ngo bcu hril rdzogs pa dang / yab kun dga' rin chen grags pa rgyal mtshan dpal bzang po nyer lnga pa'i dus me mo phag lo btsas pa yin zhing / ma ma nyid la btsas ma thag pa'i dus ltas khyad par can mang po byung tshul bdag rang lo bcu tsam 'gro dus bka' lung gnang gin 'dug ste/ tshang ma dran par yang mi 'dug /dran tshad bris kyang sgro bkur che bas bzhag /gang ltar btsas ma thag hri AHdang / oM oM zer ba