[A:309]bzhi'i sgo nas rgyal po'i btson rar tshud pa'i skye bo'i don mi dang dud 'gror bcas pa'i srog skyabs/ chos kyi sbyin pas dmigs pa med pa'i sems can thams cad tshim pa dang / zang zing gi dngos pos phyi nang thams cad tshim par byas pa sogs kyi sgo nas/ ster sbyin byed po rnams dang dmigs yul ltos par bcas pa kun gyi don du bsags pa don yod pa'i dgos pa de tsam mo/ /da lta ni rang nyid 'chi ba nam yong ngam snyam pa'i mi rtag pa'i lcag gis bskul/ ma gyur mkha' mnyam sems can gyi don du rtse gcig tu byang chub sgrub pa la gzhol ba 'di lags so/ /brgyad pa bstan pa srid mthar rgyas pa'i slad du gsung las 'khrungs pa'i bshes gnyen gyi tshogs byon pa ni/ mdo sngags gsar rnying gi rgyud sde mtha' dag la mi 'jigs pa'i spobs pa brnyes pa snyan brgyud kyi gdams pa rgya mtsho lta bu'i mnga' bdag tshul khrims kyi phung pos rgyud yongs su mdzes shing shes bya'i mkha' la mkhyen rab kyi gzi 'od 'bum phrag 'gyed pa'i sngags 'chang chen po rje btsun dbon rin po che dbang phyug rab brtan grags pa rgyal mtshan dpal bzang po/ rje btsun mchog gi dbang po'i rgyal tshab dam pa mkhan bslab gsum dbang phyug /shes bya'i dkyil 'khor mtha' dag la bsnyengs pa mi mnga' ba lung dang rigs pa smra ba kun gyi bdag nyid chen po rnam dpyod blo gros kyi bum pa gzhal du med pa kun dga' blo gros bzang po/ byang chub sems kyis dus kun 'tsho ba chos lung gi gdan sa pa dkon mchog rgyal mtshan/ mdo rgyud rgya mtsho lta bu'i pha rol tu son zhing snyan brgyud