[A:170]byung / dgon pa de gnyis su dam pa de nyid kyi sku drin la pha rol tu phyin pa'i gzhung lugs la thos bsam gyi sgro 'dogs phal cher chod/ nga'o snyam pa'i nga rgyal mchog rab las mtho ba su'i rtsar yang dpa' zhum mi dgos tsam zhig bdog /da lta ni dgon pa de la lugs gnyis khrims kyi bya bas bor ba'i karma dgon gsar zhes grag go /de nas dam pa de nyid chos grwa chen po gser mdog can du shangs pa gra tshang gi slob dpon la phebs/ zhabs phyir bdag gis kyang phyin/ lo lnga tsam bsdad/ po ti phyi ma rnams la sbyangs pa mthar phyin pa byas/ dge 'dun brgya phrag bdun tsam gyi dbus su skyes thob de nyid la ston grags che ba'i tshad thub pa zhig byung ngo / /mtha' yas srid mtsho'i sdug bsngal skyob pa'i phyir/ /rig grol ldan pa brgya phrag bdun gyi khrod/ /phar tshad 'dul sde la sogs sbyang tshul byas/ /nor mchog byang sems sdom pas rgyud las phyug /mkhas pa'i dbang po grags pa thogs med zhabs/ /bcu phrag gcig dang bse ru lo grangs bsten/ /khyod kyi drin las phung khams nyon mongs lcags/ /gser 'gyur rtsi yi rin chen rol par bsgyur/ /dal 'byor don yod yin snyam mi mtsher gda'/ /de nas gsum pa dge slong ni nyer brgyad pa la paN chen chos kyi rgyal po shAkya mchog ldan dri med legs pa'i blo'i zhabs khri la mngon par mtho ba'i gdan sa brgyad pa 'bum rab 'byams pa don gyi slad du mtshan nas smos te/ gnas brtan 'dul ba 'dzin pa dge 'dun nyi ma bstan pa'i rgyal mtshan dpal bzang pos mkhan po dang / mkhas pa'i dbang po grags pa thogs med kyis las slob