[A:212]dpag med dngos grub 'byung ba'i sgo gcig bsod nams dpal 'byor khyod kyi da dung skyongs/ /gnas lnga mthar phyin mkhas pa'i gtsug rgyan grags pa thogs med drin las phyi nang bdud las rgyal/ /da ni gang ltar byas kyang dam pa rnam gsum drin las da lta'i dus na sprang po bsod nams chos 'phel skyid/ /rang lo so gsum pa lug lo shangs yul skyid pa'i bya 'dab g.yas ru smyug gi yang dben dpal sbug rnam par grol ba'i ri khrod du zla ba bdun pa'i tshes bco lnga la gsung ngag rin po che slob bshad tshugs te/ rje btsun rin po che mkhyen brtse'i zhabs drung gis dbu mdzad skal pa bzang po'i mched po bco brgyad kyis bla ma bdun gyi bar la gnad du bsnun nas gzhi bsnyen byed lugs la nyi ma lnga tsam gyi bar la nan tan chen pos dpyis phyin pa blo yul du nges par byas te zla ba bcu gcig pa'i tshes gsum la grol/ de nub rang la 'di snang gi bya ba thams cad chu shing gi sdong po ltar du 'dug pa rgyab tu bor nas/ gzhi bsnyen gyi mtshams la rang gi bsam gtan khang bur bcad rgya shin tu dam par byas nas zla ba bdun gyi khongs su bogs 'byin pa'i zhi ba'i sbyin sreg dang bcas/ yongs 'dzin rdo rje 'chang tshar chen chos rje'i drin las bgegs med du mthar phyin/ de'i dus zla ba gnyis song ba'i cho 'phrul chen po'i tshes lnga'i nyi ma shar lhod tsam la gnyid du srib tsam song 'dug pa'i rmi lam na/ sngar mjal ba ni lta ci smos mtshan thos pa tsam min pa mig gis mthong yang ye ma myong ba'i bla ma cung zad bgres nyams pa sku'i zil lta bar mi bzod pa dbu gtsug dbu lo dang bral ba/ lha rdzas kyi chos gos rnam pa gsum dang ldan pa zhal khro 'dzum dgyes