[A:224]thams cad nga rang gi lha yin zer yid dga' dga' byed pa'i rnam pa byung ba dang gnyid sad/ bsam na de dus kyi dge mtshan du ma des lo brgya 'tsho ba'i rten 'brel mang po go lags so/ /drug sgrags ldan pa rdo rje'i gur chen nang / /phyi rol mtshan mas ma gos kha ba'i mdog /lo brgya'i bar chad tshe sbyin ma des bsal/ /'chi ba'i grong khyer bdud kyi g.yul las rgyal/ /de nas bya lo'i ston dus rang lo so lnga pa la rwa khrid mkha' 'gro snyan brgyud thun mong ma yin pa'i nyams khrid zab mo dang rgya ston gyi mdzad pa'i zin bris/ jo gdan yon lhun gyis mdzad pa'i zin bris/ rgyal khams lo tsA ba ma Ni kas mdzad pa'i zin bris/ tsha ba rong pa shAkya rgyal mtshan gyis mdzad pa'i zin bris/ de rnams kyi steng nas 'khrid tshul zab mo re re dang / gzhan yang mtshan mo rgyu ba/ mtshan ma gyen bsgreng / rwa rtse'i rnal 'byor/ 'chi kha ma'i rnal 'byor sogs 'khrid tshul du ma zhig thob cing rgyud thog nyams len la yang dag par sbyar/ de grol 'phral zla ba bcu pa'i tshes bco lnga la sngar gyi bsam gtan khang bu de nyid du rdo rje 'jigs byed kyi bsnyen pa mthar phyin par byas pa'i zhag bcu song ba'i srod thun gyi sgang la dngos su gzhogs g.yas na mar gzugs mi mngon pa'i gcan gzan sems can ma rung pa zhig yar rgyug mar rgyug byed pa'i mdun pa shar cing / de la bred dngangs shin tu che ba rig pa mnan pas mi non pa sha rnams kyang g.ya' khyug khyug byed pa/ da ltar rang had de langs na snyam pa'i zil bun ne ba had had dran pa 'tshor snyam byed pa zhig byung / dge sbyor tshan bskyed nas gang yong ba shog da lta rang za na yang zo