[A:༤༩༢]འཁོར་ལོའི་མགོན་པོ་བླ་མ་རྡོ་རྗེ་འཆང་ལ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ནམ་མཁའི་ཁམས་ཡོངས་སུ་གང་བ་ཏིང་ངེ་འཛིན་གྱི་མཐུས་སྤྲུལ་པར་མ་ཟད་དངོས་སུའང་ཆུ་གཉིས་སྔོན་དུ་འགྲོ་བའི་ཉེར་སྤྱོད་བརྒྱ་ཕྲག་ཏུ་ལོངས་པ་ཉིན་རེ་བཞིན་བསྟར་བར་མཆོད་དཔོན་འཇམ་དབྱངས་རྒྱལ་མཚན་གཅིག་པུས་ལག་དར་བས་ཉིན་མཚན་ཀུན་ཏུ་ངལ་བའི་དཀའ་ཐུབ་ལ་བརྟེན་པའི་ཚོགས་བསགས། དགྱེས་རྡོར། འཇིགས་བྱེད། ཡང་གསང་ཁྲོས་པ། ཀུན་རིག །སྨྱུང་གནས་དང་ལྔའི་གདུང་ཆོག་བཙུགས། རི་ཕུག་ནས་ཁྱབ་བདག་ཞ་ལུ་པ་ཆེན་པོ་ཕེབས་པ་རྒྱང་གཟིགས་ནས་ནམ་མཁའ་གཡའ་དག་པ་ལ་འཇའ་དཀར་སྐུ་གདུང་རིན་པོ་ཆེར་མདུང་ཚུགས་སུ་ཟུག་པས་མཚོན་པའི་གཟིགས་སྣང་ཁྱད་པར་ཅན་བྱུང་བར་གདའ། ཞབས་དྲུང་དབོན་དང་རྗེ་ཞ་ལུ་པ་གཉིས་གསོལ་ཚིགས་གནང་བའི་ཚེ་ནམ་མཁའ་ཐམས་ཅད་མེ་ཏོག་གི་ཆར་གྱིས་གང་བས་ཚོམ་ཆེན་གྱི་རྒྱ་མཐོངས་ལ་མི་ཤོང་བ་ལྟ་བུ་བབས། ཉེ་སྐོར་གྱི་སེར་ཚོགས་གྲལ་དབུར་ཡངས་ཅན་མཁན་རིན་པོ་ཆེ་ངག་དབང་ཆོས་གྲགས་གདན་དྲངས་པའི་ཚར་མང་ཇ་འགྱེད་འབུལ་བ་སོགས་གྱ་ནོམ་པས་བསྙེན་བཀུར། ཡུལ་མི་རྣམས་ལ་འབྲུ་ཁྲོ་ཟངས་སོགས་ཀྱི་སྦྱིན་གཏོང་མཛད། ཧོར་ཟླ་བཅུ་གཉིས་པའི་ཚེས་བརྒྱད་ཀྱི་ནུབ་ཀྱེ་རྡོར་མན་ངག་ལུགས་ཀྱི་དཀྱིལ་འཁོར་གྱི་སྒོ་ནས་སྐུ་གདུང་རིན་པོ་ཆེ་དཔལ་ཧེ་རུ་ཀཿཞལ་བརྒྱད་པའི་རྣམ་པར་གྱུར་པ་ལ་རྫས་ཆེན་བཅུ་གཉིས་གཙོ་བོར་གྱུར་པའི་མཐའ་ཀླས་པའི་མཆོད་པ་ཐམས་ཅད་མཆོད་བྱ་མཆོད་བྱེད་དང་བྲལ་བའི་གནས་ལུགས་རང་ངོ་དོན་གྱི་བླ་མར་རྟོགས་པའི་རྡོ་རྗེ་འཆང་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོ་ཉིད་ཀྱིས་ཕྱག་དར་ནས་ཞུགས་སུ་