[A:༤༩༣]ཕུལ་བའི་སང་ཉིན་ནམ་མཁའ་ཐམས་ཅད་འཇའ་སྤྲིན་དང་ལྷ་རྫས་མནྡ་ར་བའི་ཆར་གྱིས་གང༌། པུར་ཁང་ཞལ་ཕྱེ་བས་ཚེམས་ལ་དུང་དཀར་གཡས་འཁྱིལ་མགོ་སྤྲོད་དབར་དུ་འཕེལ་གདུང་ཡུངས་ཀར་སྤུངས་པ་ལྟ་བུ་བྱུང༌། ས་སྐྱར་དཀར་པོ་རྒྱང་གྲགས་བུས་པའི་ཚོགས་སུ་མང་འགྱེད་ཚར། བཞི་ཐོག་ཏུ་བདག་ཆེན་ཁྲི་རིན་པོ་ཆེར་འབུལ་བ། གཙུག་ལག་ཁང་དང་མགོན་ཁང་རྣམས་སུ་མཆོད་པ། ཁའུ་སྐྱེས་ལྷས་སུ་མང་ཇ་ཞྭ་འགྱེད། ཞ་ལུར་མང་ཇ་ཚར། ས་ལུགས་གཙོ་བོར་གྱུར་པའི་དབུས་གཙང་གི་དགོན་པ་མང་དག་ལ་མང་ཇ་བསྔོ་རྟེན། ཡར་ཀླུངས་སུ་སེར་ཚོགས་རྒྱས་པའི་གྲལ་དབུར་རྡོ་རྗེ་བྲག་ནས་བྱང་བདག་རིག་འཛིན་ཆེན་པོ་གདན་དྲངས་པའི་འབུལ་བ་མང་འགྱེད་ཚར། བཀྲ་ཤིས་རྩེ་ཆོས་སྡེར་རྡོ་རྗེ་འཆང་གི་སྐུ་བརྙན་གཙོ་བོར་བཞུགས་པའི་ལམ་ཟབ་ལྷ་ཁང་དངོས་གཙང་བ། ནག་པ་ཟླ་བར་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་སྒྲུབ་མཆོད་སྟར་ཆགས་སུ་བཙུགས། ཚར་ཆེན་ཡབ་སྲས་གསུམ་གྱི་བཀའ་འབུམ་གསར་བཞེངས་སོགས་རྡོ་རྗེ་འཆང་མགོན་པོ་བསོད་ནམས་མཆོག་ལྡན་གྱིས་ཐུགས་ཁུར་བཞེས་ཏེ་དྲིན་ཅན་བླ་མ་གདན་གསུམ་ཚང་བའི་རྡོ་རྗེ་སློབ་དཔོན་གང་གི་དགོངས་པ་ཟག་མེད་ཆོས་ཀྱི་དབྱིངས་སུ་རྫོགས་པར་མཛད་དོ། །འགྲོ་ཆེད་མནར་མེད་གནས་སུ་འཇུག་པ་ལ། །རྒྱལ་དང་དེ་སྲས་སྤྲོ་དགའ་ཆེར་ལྟ་ན། །མི་བསྲུན་ཚེར་མལ་གྱིས་འབྱུང་ཞི་བའི་དབྱིངས། །གཟིམས་པར་མཛད་ན་སེམས་པའི་ངང་ཚུལ་ཅི། །འཆི་མེད་ལེགས་ལྡན་མགོན་པོ་ལ་བརྟེན་ནས། །འཆི་བའི་དངོས་བརྒྱ་འཇོམས་པའི་རྟེན་འབྲེལ་མཐུས། །འཆི་བདག་བདུད་སྡེའི་དཔུང་བཅས་ཟིལ་མནན་ཏེ། །འཆི་གསོས་སྨན་བཞིན་གདུལ་བྱའི་རེ་བ་བཀང༌། །ཡིད་སྲུབས་འཇམ་མཉེན་