[A:༤༩༡]ཆུབ་ཀྱི་བར་དུ་རྗེས་སུ་འཛིན་ནོ་ཞེས་ཞལ་གྱིས་བཞེས་ནས་སྣང་མཆེད་ཐོབ་གསུམ་གྱི་མཐར་འཆི་བ་འོད་གསལ་ཆོས་ཀྱི་སྐུའི་ངང་དུ་ཐུགས་དམ་ལ་ཞག་གཅིག་གི་རིང་བཞུགས། དགོངས་རྫོགས་ཀྱི་གྲབས་ཡུལ་ཐུགས་གྲ་འགྲིག་མི་འགྲིག་ཁྱད་ནས་ཞག་འགའ་ཞིག་གསང་བའི་ཚུལ་གནང༌། རྗེ་བཀའ་འགྱུར་བ་ཆེན་པོ་སང་ཕྱི་དྲོ་གདུང་མཇལ་ལ་ཕེབས་ཤིན་ཏུ་འདོད་པ་བྱུང་བས་བྱོན་པ་དང་ཐུགས་དམ་གྲོལ་བ་འགྲིག །ཤངས་གཡས་ནས་བྱང་སེམས་དཀར་པོ་ཁྱོར་བ་གང་ཙམ་ཕེབས་པ་ཞལ་དུ་མཆོད་པས་ཉམས་རྟོགས་ཀྱི་བོགས་ལྷག་པར་ཆེ་ཞིང་རྡོ་རྗེ་འཆང་ཀུན་སྤངས་ཆོས་རྗེས་མེ་ཏོག་འཐོར་བའི་དུས་སྐུ་ཁམས་ཟགས་ཏེ་བཞུགས་སྟན་སྟེང་དུ་འཁྱིལ་བ་ཚར་ཆེན་ཆོས་ཀྱི་རྒྱལ་པོས་ལྷག་མེད་དུ་བཞེས་པ་སྙན་བརྒྱུད་ཀྱི་བསྟན་པ་ཟིན་པའི་རྟེན་འབྲེལ་འགྲིག་པ་དང་དབྱིབས་འདྲ་བར་མཆིས། རྗེ་བླ་མའི་གདུང་ཁང་གི་གཡས་སུ་ཐུགས་དམ་རྟེན་གྱི་ཀྱེ་རྡོར་གྱི་སྐུ་ཞིག་ཡོད་པ་ཞལ་ཐད་སོར་བསྒྱུར་རུང་སྐུ་གདུང་རིན་པོ་ཆེར་ལན་གསུམ་འཆུས་པ་བྱུང༌། ཞིང་བརྗེས་པའི་ཉིན་ནས་རླུང་ཕྲ་མོ་ཙམ་གྱིས་འགྱུ་བ་འགགས་ཏེ་ནམ་མཁའ་མཐིང་ཞུན་མའི་མདོག་ལྟར་སྔོ་ལ་སྟོན་གྱི་རྡུལ་བྲལ་བཞིན་དངས་པར་ལྷའི་ཚོགས་ཀྱིས་མེ་ཏོག་འདབ་མ་བཞི་པ་དང་ལྔ་པ་སོགས་ཡུ་བ་ལྡན་པའི་ཆར་བུ་ཡུག་ལྟ་བུར་འཚུབས། ཤེལ་ལ་མཚོན་རིས་ཀྱི་ཁ་དོག་བསྒྱུར་བ་འདྲ་བའི་དབང་པོའི་གཞུས་ཕྱོགས་ཀུན་ཏུ་དཀྲིས། ཆེད་དུ་སྤར་བའི་སྤོས་དུད་ཀྱིས་བསྐྲུན་པར་མི་ནུས་པའི་གདུང་ཡིད་བཞིན་གྱི་ནོར་བུ་ལས་སྔར་མ་མྱོང་བའི་དྲི་ཕུན་སུམ་ཚོགས་པ་ལྡང་བ་སོགས་ངོ་མཚར་བའི་དགེ་མཚན་ཇི་སྙེད་པ་བྱུང༌། དཔལ་ཀྱེ་རྡོ་རྗེ་མན་ངག་ལུགས་ཀྱི་དཀྱིལ་འཁོར་ལ་བརྟེན་ནས་