[A:༤༩༥]ཚུན་གོ་བསྡུར་ཚེ་ལོ་ཟླ་སོགས་ནོར་འཁྲུལ་འགའ་ཞིག་མཆིས་པ་མི་ཐོག་བརྗེས་པའི་རྒྱུས་ཡོད་ཀྱང་དཀོན་གཤིས་དྲི་ཡུལ་ཡང་ཆེར་མི་འདུག་མོད་འོན་ཀྱང་རིན་པོ་ཆེ་ཡོལ་པ་བ། མཁན་ཆེན་བསླབ་གསུམ་རྒྱལ་མཚན། སྔགས་འཆང་ཆེན་པོ་བསོད་ནམས་ཆོས་འཕེལ་གསུམ་གྱི་རྣམ་ཐར་ལ་ཞིབ་ཏུ་དཔྱད། ཁྱབ་བདག་ཞ་ལུ་པར་ཐུགས་རྒྱུས་མངའ་བ་རྣམས་ལ་དྲི་མལ་ཞུས། རྡོ་རྗེ་འཆང་བཀའ་འགྱུར་བའི་གསུང་བགྲོས་ཐོར་བུ་བློ་ཟིན་པས་བརྒྱན། དུས་ཚེས་སོགས་ངེས་པ་དང་གཏན་ཚིགས་ཀྱིས་བསྒྲུབ་རུང་གི་སྟེང་དུ་བག་ལ་ཉལ་གྱི་ཚོགས་ཀྱང་རུང་མཐུན་སྦྱར་ཏེ་བྲིས་པ་སྤྱིར་སོ་སོ་སྐྱེ་བོ་འཁྲུལ་པའི་རང་བཞིན་ཅན་ཡིན་པར་མ་ཟད་ས་བོན་ཧ་ཅང་མི་གསལ་བ་སོགས་ནས་ནོངས་པའི་ཚོགས་ཡོད་ནའང་བླ་མ་ཚད་མའི་དུས་ཀྱི་བརྒྱུད་པ་ལ་ཕན་པའི་ལྷག་བསམ་གྱིས་བཀོད་ཟིན་ཏོ། །བློ་འདས་གདོད་མའི་མགོན་པོ་ཆོས་སྐུའི་དབྱིངས། །མཚན་དཔེའི་དཔལ་འབར་ལོངས་སྐུ་རྟ་ལྗང་ཅན། །སྤྲུལ་སྐུའི་འོད་ཟེར་འགྲོ་བའི་བསམ་པ་དང༌། །འཚམ་པར་སྤྲོ་བའི་ཕ་མཐའ་གང་གིས་རྙེད། །འོན་ཏེ་དབང་ཕྱུག་ཡོན་ཏན་བརྒྱད་ལྡན་པ། །མཁྱེན་རབ་ནོར་འཛིན་བུ་མོའི་མངལ་ཡངས་པོར། །ལུང་རྟོགས་ཡོངས་འདུའི་རྩ་བ་ཆེས་བརྟན་པའི། །སྒྱུ་འཕྲུལ་གར་ལས་འདོད་དགུའི་གྲུ་ཆར་ཕོབ། །སྙིང་པོའི་ཚད་ལྡན་ཡང་སྲིད་བདག་ཆེན་རྗེ། །སྙན་བརྒྱུད་ཆོས་ཀྱི་ཉི་མ་རྡོ་རིང་པ། །སློབ་བཤད་ཤིང་རྟའི་སྲོལ་འཛིན་ཚར་པ་རྗེ། །རྣམ་གསུམ་བསྟན་པའི་ཆེད་དུ་ཁྱེད་བྱོན་སྙམ། །མཁྱེན་བརྩེ་ནུས་པའི་དབང་ཕྱུག་བླ་མ་དེའི། །གདུང་འཚོབ་བསྟན་པའི་རྒྱལ་སྲིད་ཉེར་བསྐྱངས་ཏེ། །བཤད་སྒྲུབ་རིང་ལུགས་དར་མཛད་གནས་གསར་པའི། །རྟོགས་བརྗོད་ཟླ་བས་སྙིང་གི་ཟུག་རྔུ་འབྱིན། །ཁྱོད་ཞབས་བསྙེན་པའི་