[A:༣༩༨]ཕྲ་བས་དབང་བརྡ་འཕྲོད་པ་སོགས་ག་ལ་འོང་ཡང་ཡིད་སྲུབས་སྡེར་བཅས་ཀྱི་གཡུལ་ལས་རྒྱལ་བའི་ཆེད་དུ་དཔལ་ལྡན་བླ་མ་འཇམ་དཔལ་རྡོ་རྗེ་མ་ཧེའི་ཞལ་ཅན་དང་ངོ་བོ་དབྱེར་མ་མཆིས་པའི་ནུས་པས་གཞི་མ་དག་པའི་ཕུང་ཁམས་སྐྱེ་མཆེད་ཐམས་ཅད་ཏིང་ངེ་འཛིན་གྱིས་མངོན་པར་སྦྱངས་ཏེ་འབྲས་བུ་གཤིན་རྗེའི་གཤེད་རིགས་ལྔའི་ཡེ་ཤེས་ཀྱི་ངོ་བོར་བྱིན་གྱིས་བརླབས་པས་སྐུ་ཚེ་མཛད་འཕྲིན་ཐམས་ཅད་མཐར་ཕྱིན་པའི་རྟེན་འབྲེལ་གྱི་སྒོ་ཐོག་མར་འགྲིག །ཡབ་མེས་ཡུམ་སོགས་ཆབས་ཅིག་པར་དབང་ཞུ་བ་མཛད་པའི་ལུང་བསྟན་གྱི་ཚེ་གསང་མཚན་དྲི་བའི་ལན་ཨ་མེས་རིག་འཛིན་གྱིས་གོས་དཀར་མོ་ཞེས་ཞུས་པས་ཚར་ཆེན་གྱིས་ཞང་པོ་དྲུང་པ་ཀླུངས་ལོག་པ་འདྲ་གསུངས་པས་ཐམས་ཅད་བཞད་ཤིན་ཏུ་བྲོ་བའི་རྣམ་འགྱུར་སོགས་དགྱེས་དགྱེས་མཛད། རྣམ་སྣང་མིང་དབང་གི་གསང་མཚན་འདོགས་པ་དང་དུས་མཚུངས་པར་ཞ་ལུ་ནས་ཀུན་མཁྱེན་མཁྱེན་བརྩེའི་ཞབས་ཀྱིས། བསོད་ནམས་ནམ་མཁའི་ཁྱོན་ལྟར་ཡངས་པ་ཡི། །བསམས་པའི་དོན་ཀུན་ཡིད་བཞིན་འགྲུབ་པའི་དཔལ། །ཕྱོགས་ལས་རྣམ་པར་རྒྱལ་བའི་འཕྲིན་ལས་ཅན། །བརྒྱུད་འཛིན་དབང་པོ་ལོ་བརྒྱར་འཚོ་བར་ཤོག །ཅེས་པའི་བརྟན་བཞུགས་ཀྱི་ཚིགས་བཅད་སྐྱེལ་མི་འགྲིག་པས་ངོ་མཚར་དང་དགེ་མཚན་འགྲན་པ་བཞིན་ནོ། །རྒྱལ་ཀུན་བླ་མེད་ཡེ་ཤེས་འཕྲུལ་པོ་ཆེས། །སེམས་ཅན་བསམ་པའི་ཁྱད་པར་མཁའ་མཉམ་མཐས། །བློ་གྲོས་མིག་སྔོན་གོམས་པས་གཞལ་བའི་མཐུ། །ཕྲ་བ་སྒྲིབ་པའི་ལུས་ཅན་ཀུན་གྱི་གཤིས། །སྲིད་པའི་ལམ་དུ་འཁྱམས་པས་ངལ་དུབ་སྟེ། །མ་རིག་འཐིབས་པོའི་མལ་དུ་ཉལ་བའི་