[A:༤༠༠]མཁྱེན་མཁྱེན་བརྩེའི་ཞབས་ཀྱིས་དབང་གནང་བའི་ཚེ་གཞོན་ནུས་བུམ་པ་ཚུར་བཞེས་ནས་དབང་བསྐུར་བའི་སྟང་ཀ་མཛད་པས་རྒྱལ་ཡུམ་གྱིས་སྔོན་གནས་རྗེས་དྲན་གྱི་བག་ཆགས་སད་པར་དགོངས་ཏེ་ཐམས་ཅད་མཁྱེན་པས་བུམ་པར་དབུ་ཐུག་ཐུག་གནང་ནས་ངའི་བླ་མ་ཡིན་གསུང་མཉེས་མཉེས་རང་མཛད། རྡོ་རྗེ་འཆང་ཚར་པ་ཆོས་རྗེར་ཚེས་དཔག་མེད་གྲུབ་རྒྱལ། དམར་པོ་སྐོར་གསུམ། གུར་ཞལ། སྟག་ཞོན་སོགས་རྗེས་གནང་གི་རིགས་མང་བ། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་དྲུང་དུ་དུས་འཁོར་གསང་འདུས་འཇམ་རྡོར་རྭ་ལུགས་དགྲ་ནག་བཀའ་བརྒྱད་གསང་རྫོགས་སོགས་སྔགས་གསར་རྙིང་གི་དབང་བཀའ་ཁ་ཤས་གསེར་ཆོས་དང་མགོན་པོ་ཆེ་ཆུང་གིས་མཚོན་རྗེས་གནང་ཐོར་བུ། འོད་ཟེར་དྲི་མེད་ལྷ་ལྔའི་རིག་གཏད་སྒྲོལ་དཀར་ཡིད་བཞིན་འཁོར་ལོ་སོགས་རྗེས་གནང་གི་རིགས་མང་བ། རྗེ་རིག་འཛིན་ཆེན་པོར་ཀུན་མཁྱེན་མཁྱེན་བརྩེའི་ཞབས་ཀྱི་སྔགས་རྙིང་མ་འདུས་པ་མདོ་དབང་ཆེན་མོ་ཞུ་བ་མཛད་པའི་ཞབས་ཕྱི་མཛད་ནས་གསན། མེ་སྟག་དགུང་ལོ་བརྒྱད་ཀྱི་དུས་ཆོས་དབང་རིན་པོ་ཆེའི་གཏེར་ཆོས་ཐམས་ཅད་མཁྱེན་པ་བུ་སྟོན་རིན་པོ་ཆེ་ནས་བརྒྱུད་པའི་གོང་ཁུག་མར་གྲགས་པའི་ཚེ་སྒྲུབ་གནང་བའི་དུས་འཇམ་དབྱངས་མཁྱེན་བརྩེའི་དབང་ཕྱུག་ཉིན་སྟར་གྱིས་ཕེབས་ཏེ་གེགས་སེལ་བོགས་འདོན་སོགས་སྤྱན་དམིགས་ཀྱི་བསླབ་དོན་མཛད། དཔལ་ཕུག་རྣམ་པར་གྲོལ་བའི་རི་ཁྲོད་འདིང་བའི་སྐབས་ལས་མིས་བྲག་བཤགས་པའི་རྦབ་ཉེན་བྱུང་བ་ན་རྨོ་མོས་བྲོས་གསུངས་པར་འཇིགས་པ་མེད་པའི་དཔའ་གདེངས་ཀྱིས་ཕཊ་སྒྲ་དང་བཅས་སྡིགས་