[A:༤༠༦]འགྲན་ཟླ་ཀུན་དང་བྲལ་བ་ཡིན། །ཞེས་ཚར་ཆེན་གྱི་གསུང་མགུར་ལས་བྱུང་བ་དང་མཚུངས་པར་སེམས། སྐུ་ན་གཞོན་དུས་ནས་རབ་ཏུ་བྱུང་བ་གནང་བཞེད་ཆེ་ཞིང་འཇམ་དབྱངས་བྱང་གླིང་བཀྲ་ཤིས་རྒྱལ་མཚན་གྱིས་ཀྱང་སྐུ་ཆོས་གནང་བ་འགབ་ཚུལ་དང༌། ངེད་རང་གྲ་རྐྱང་ཡིན་ཀྱང་བྲང་ཁང་དབང་ཆས་སོགས་ཆས་ཕྱི་ནང་ཀུན་ཕུགས་འཇགས་རྩིས་ཀྱི་ལྷན་དུ་བཞུགས་ན་ཡོང་བ་སོགས་ཀྱི་བསླབ་བྱ་ནན་ཏན་དུ་མཛད་རུང་འཕྲང་འགོ་གཏེར་སྟོན་གྱི་རྟ་མགྲིན་དྲེགས་པ་ཀུན་འདུལ་གྱི་བསྐྱེད་རྫོགས་འཁྲུལ་མེད་ཙིཏྟ་དམར་པོ་ལས། ལྔ་བརྒྱ་ཐ་མ་དུས་ཀྱི་སྙིགས་མ་ལ༔ ཤནྟིའི་མིང་འཛིན་བདུད་ཀྱི་བར་ཆད་ཀྱིས༔ མངའ་རིས་ཕྱོགས་ནས་ཧོར་གྱི་མནན་པ་འདོན༔ ཧ་ལ་འབིག་གིས་ངམ་རིང་བར་དུ་འཇོམས༔ བྱང་གི་ངམ་རར་བདུད་སྲིན་འགོ་ནད་སློང་༔ ས་བདག་ནམ་མཁའི་སྙིང་ལ་བར་ཆད་འཇུག༔ དེ་དུས་བྱང་གི་རི་སྣ་བཅུ་གསུམ་རྩེར༔ པདྨ་མཚན་བརྒྱད་གཙུག་ལག་བཅུ་གསུམ་རེ༔ བརྩིགས་ན་བྱང་ཕྱོགས་རྒྱལ་པོ་མངའ་ཐང་རྒྱས༔ ཞེས་པ་ལྟར། བྱང་གཙང་རོང་གསུམ་གྱི་བདེ་གཟར་ཡོ་འཁྱོམས་ཆེ་སྐབས། མེ་བྱི་ལོ་བྱང་པ་ནམ་མཁའ་རྒྱལ་མཚན། ཀུན་རིན་པ། གཙང་པ་ཞིང་ཤག་པ། རིག་འཛིན་ཡོངས་འདུས་ཀྱི་ལུང་བསྟན་བཞིན་འགོང་པོའི་སྤྲུལ་པ་ཀུན་སྤངས་པ་རྣམས་རྩེ་བསྟུན་པའི་ཆོས་རྒྱལ་བཀྲ་ཤིས་སྟོབས་རྒྱལ་གྱི་ཕྱོགས་སུ་ཕུལ་ཏེ་གནས་གསར་བར་བཀའ་བཀྱོན་དུས་འཕོ་འགྱུར་ཆེན་པོས་མཛད་དཀའི་སྐབས་སུ་སོང་བ་དང་སྲས་ཀྱི་བགྲེས་ཁ་ཡིན་གཤིས། སྒོ་དུ་མ་ནས་ཡབ་ཡུམ་ཕྱག་ཕྱི་བ་སོགས་ཚང་མས་མགྲིན་གཅིག་ཏུ་ཁྱེད་ཀྱིས་ཆོས་མཛད་ན་གནས་གསར་བ་མིང་