[A:༤༡༡]གནས་བརྟན་འདུལ་བ་འཛིན་པ་མཁན་ཆེན་བྱམས་པ་རབ་བརྟན་གྱི་དྲུང་དུ་ཚིགས་སྔ་མ་དགེ་ཚུལ་གྱི་སྡོམ་པ་ལེགས་པར་བཞེས་པའི་བརྗེ་བ་རྣམ་པ་གསུམ་གྱི་སྐབས་མཚན་དབང་ཕྱུག་རབ་བརྟན་བསྟན་པའི་རྒྱལ་མཚན་དཔལ་བཟང་པོར་གསོལ། མགོན་པོ་ཁྲོ་བཅུའི་རྗེས་གནང་སོགས་ཆོས་རྣམ་གྲངས་མང་དུ་གསན། དེ་ནས་མ་འགྱངས་པར་འཇམ་མགོན་ས་སྐྱ་པའི་གཞུང་ལུགས་བྱེ་བའི་སྲོལ་འཛིན་ཀུན་མཁྱེན་གོ་བོ་རབ་འབྱམས་པ་བསོད་ནམས་སེང་གེའི་བསྟི་གནས་ཆོས་གྲ་ཆེན་པོ་ཐུབ་བསྟན་རྣམ་པར་རྒྱལ་བའི་གླིང་དུ་དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་གནས་བརྟན་འདུལ་བ་འཛིན་པ་ཆེན་པོ་བྱམས་པ་རབ་བརྟན་པས་མཁན་པོ། ཁྲིམས་ལྡན་ངུར་སྨྲིག་འཛིན་པ་ཆོས་འོད་ཟེར་གྱིས་ལས་ཀྱི་སློབ་དཔོན། གསང་སྟོན། གྲིབ་ཚོད་པ་སོགས་དད་པའི་དགེ་འདུན་གྲངས་ཚང་བའི་དབུས་སུ་བསྟན་པའི་རྩ་བ་སོ་སོར་ཐར་པ་རིགས་བརྒྱད་ཀྱི་ནང་ནས་མཆོག་ཏུ་གྱུར་པ་དགེ་སློང་གི་དངོས་པོར་བསྒྲུབས་ཏེ་ལེགས་པར་གསུངས་པའི་ཆོས་འདུལ་བའི་རྒྱལ་མཚན་ཆེན་པོ་ཤཱཀྱ་སེང་གེའི་རིང་ལུགས་ཀྱི་བ་གམ་མཐོན་པོའི་རྩེ་མོར་མངོན་པར་བསྒྲེངས་པའི་གནས་བརྟན་འདུལ་བ་འཛིན་པ་ཉེ་བར་འཁོར་གཉིས་པ་ལྟ་བུར་གྱུར་པ་ནི་ཚར་ཆེན་གྱི་གསུང་ལས། དེང་དུས་འདི་ན་ཁ་ཅིག་གཞན་དབང་གིས། །རང་ཡུལ་བླ་མ་ཚུལ་འཆལ་དག་ལ་ནོད། །གཞན་དག་བསམས་བཞིན་ཐག་རིང་སར་བགྲོད་ནས། །ཆེན་པོ་ཧོར་འདྲའི་སྤྱོད་ཚུལ་ཅན་ལ་ཞུ། །བདག་གིས་ཚེ་འདིའི་ངོ་བསྲུང་རྒྱབ་ཏུ་བོར། །ཕྱི་མའི་དོན་ཆེན་འབའ་