[A:༤༡༣]འཚམས་སྤྲིན་གོས་ཀྱི་འདབ་གཤོག་ཅན། །ངུར་ཁྱུ་ཕལ་ཆེར་དོན་མེད་ཅ་ཅོས་ངལ། །བློ་གསལ་གདམས་པའི་རྒྱ་མཚོ་དཔག་དཀའི་མཐའ། །མཁྱེན་བརྩེའི་རྫིངས་ཀྱིས་དབང་ཕྱུག་བརྒྱད་ལྡན་གླིང༌། །བགྲོད་ནས་དངོས་གྲུབ་རིན་ཆེན་འདྲེན་པའི་ཁུར། །འདེགས་ནུས་སྙིང་སྟོབས་ཚུལ་ལ་ཁྱབ་འཇུག་ཞུམ། །པད་འབྱུང་སླར་ཡང་གངས་ཅན་འགྲོ་བ་ལ། །རྗེས་བརྩེ་མཆོག་གི་སྤྲུལ་སྐུ་མངའ་རིས་པས། །ཐེག་དགུའི་ཆོས་སྒོ་ཕྱེ་ཚེ་རྒྱལ་པོ་ཛ། །སྐྱེངས་ཏེ་འོག་མིན་ཞིང་དུ་བྲོས་སམ་སྙམ། །རིས་མེད་མདོ་རྒྱུད་ཆུ་ཕྲན་ཀུན་བཏུངས་པས། །ཡངས་པའི་མཁྱེན་རབ་ལྟོ་བ་མ་ཁེངས་པར། །བསླབ་གསུམ་ཚངས་པའི་ཞལ་སྒོའི་རིལ་ཀླུང་ནས། །ཕབ་པའི་སྙན་བརྒྱུད་གངྒཱ་འཐུང་ལ་བྲེལ། །སྲིད་འབྱོར་འདོད་ལྷར་སྡང་བའི་ངེས་བྱུང་མེས། །རྟེན་འབྲེལ་ལུགས་འབྱུང་འཁོར་བ་རགས་པའི་ལུས། །བསྲེགས་ཏེ་བག་ཡོད་དབང་ཕྱུག་བརྒྱད་ལྡན་ལྷ། །གཏན་མདུན་རལ་རྩེར་ཐར་པའི་ཟླ་བ་ཚེས། །མཁན་ཆེན་བསླབ་གསུམ་རྒྱལ་མཚན་མཁའ་སྤྱོད་ཧེ་རུ་ཀའི་གྲོང་ཁྱེར་དུ་མེ་གླང་སྐུའི་བཀོད་པ་བསྡུས་པར་བརྟེན་བསྟན་པ་སྤྱི་བྱེ་བྲག་གི་གསན་བསམ་འཕྲོར་ལུས་པ་རྣམས་གསན་པའི་ཆེད་དུ། ས་གླང་བསམ་གྲུབ་དགོན་གསར་དུ་ཕེབས། སྙན་གསན་འབུལ་བར་གནང་བ་ལྟར་སྔགས་འཆང་རིན་པོ་ཆེས་ཞལ་གྱིས་བཞེས་ཏེ་རྗེ་འདི་ཉིད་ཞག་ཤས་ཆོས་སྒུགས་སུ་བཞུགས། རིན་པོ་ཆེ་མཚོ་སྒོ་བའི་རྐྱེན་སེལ་ལ་སྐོར་ཙམ་བྱོན་ནས་ཕྱིར་ལམ་དགྲ་ཇག་གི་འཚེ་བ་མང་བའི་གངས་དབར་སླ་ང་སྟོངས་ལ་སྲུང་མའི་དབང་པོ་རྡོ་རྗེ་ནག་པོ་ཆེན་པོ་གུར་གྱི་མགོན་པོ་རུ་འདྲེན་སྡེ་