[A:༤༡༥]སེམས་ལ། མདོར་ན་བཀའ་དྲིན་ཆེ་བའི་བླ་མ་ཞིག་ཏུ་མཛད་པས་ཞལ་གྱི་གསང་ཁྲིད་ཀྱི་ཡི་གེ་ལས། རྒྱལ་བ་ཀུན་དངོས་ཁྱབ་བདག་རྡོ་རྗེ་འཆང༌། །རིགས་བརྒྱའི་འཁོར་ལོས་སྒྱུར་བའི་ཟློས་གར་གྱིས། །དེང་འདིར་སྐྱེ་རྒུའི་དོན་སླད་བཤེས་གཉེན་སྐུ། །ཕ་རྒོད་སྐུ་དྲིན་དབང་པོ་དགོན་གསར་བ། །མགོན་དེའི་གསུང་གི་གསང་བ་མི་ཟད་པ། །ཟབ་རྒྱས་སྙན་བརྒྱུད་བདུད་རྩིའི་རྒྱ་མཚོ་ལས། །དད་གུས་སྙིམ་པའི་བཅུད་ཀྱིས་བསྡུས་པ་འདི། །སྐལ་བཟང་སྙིང་ལ་གྲུབ་པའི་དགའ་སྟོན་སྤེལ། །ཞེས་པ་གསང་འཁྲིད་གཅིག་པུར་མ་ཟད་ཟབ་ཆོས་གཞན་ལའང་སྦྱོར་རིགས་པར་མཆིས། དབྱངས་ཅན་ལྷ་མོས་རྗེས་སུ་བཟུང་བས་མདོ་རྒྱུད། སྒྲ་ཚད། སྙན་དངགས་སོགས་རིག་པའི་གནས་མཐའ་དག་ལ་མཁྱེན་རབ་ཀྱི་སྤྱན་དཀྱུས་ཤིན་ཏུ་རིང་བས་དུས་ཐོག་དེ་ནས་དགེའི་དགེ་བའི་བཤེས་གཉེན་གཞན་དག་གིས་བསྒྲུན་དུ་མེད་པ་ཐམས་ཅད་མཁྱེན་པ་ཀླུ་སྒྲུབ་རྒྱ་མཚོ་ཞེས་གསང་ཆེན་སློབ་བཤད་འཛིན་པའི་ཤིང་རྟ་པ་ཆེན་པོ་དེ་ལ་སྒྲོལ་དཀར་དང་དཔལ་ལྡན་དམག་ཟོར་མའི་རྗེས་གནང་སོགས་ཆོས་བཀའ་ཁ་ཡར། རྗེ་བྱམས་པ་སྐལ་བཟང་ལ་ནེ་གུ་དང་ཚེ་དཔག་མེད་གྲུབ་རྒྱལ་མའི་བསྐྱེད་རྫོགས་ཀྱི་ཁྲིད་སོགས་ཆོས་མང་བ། རིན་པོ་ཆེ་སྟོབས་ལྡན་འོད་ཟེར་ལ་འདོད་རྒྱལ་གྱི་འཁོར་ལོའི་ཕྱག་ལེན། ཛ་བིར་གྱི་བྷྲཱུར་རླུང་སོགས་མན་ངག་ཟབ་ཆོས་མང་དག །ཐམས་ཅད་མཁྱེན་པའི་མཆོད་དཔོན་དྲུང་པ་དཀོན་ལེགས་པར་གསུང་འབུམ་ནང་གི་ཆོས་སྣ་འགའ་ཞིག་གིས་མཚོན་པའི་ཟབ་དོན་གྱི་ཆོས་བཀའ་དུ་མ་རྣམས་གསན། སྐུ་རྟེན་སྐྱ་བོའི་