[A:༤༡༦]དུས་སུའང་སྐུ་གསུང་ཐུགས་ཀྱི་ཡོན་ཏན་ལ་ངེས་པ་རྙེད་པ་དུ་མས་བཀའ་ཆོས་ཞུས་པར་མ་ཟད་རབ་ཏུ་བྱུང་བ་ནས་བཟུང་དབང་འཁྲིད་ལུང་མན་ངག་གིས་མཐའ་ཀླས་པའི་གདུལ་བྱའི་རེ་བ་ཡོངས་སུ་བསྐང༌། ཆུ་འབྲུག་བཀའ་དྲིན་མཉམ་མེད་འབྲུའི་སྔགས་འཆང་ཆེན་པོའི་དྲུང་དུ་རྗེ་དམ་པ་འདི་ཉིད་དང༌། ཆོས་རྗེ་བྱམས་པ་ཤཱཀྱ་བློ་གྲོས། ཆོས་རྗེ་ངག་དབང་པ། ཆོས་རྗེ་དཀོན་མཆོག་ལེགས་འཛིན། ཁམས་པའི་སློབ་བུ་གསུམ་དང་བཅས་ལྷན་ཅིག་པར་དབང་འཁྲིད་ལུང་མན་ངག་མང་དུ་གསན། དགུང་ལོ་སོ་བརྒྱད་པ་མེ་ཕོ་སྤྲེའུའི་ལོ་དབུས་ལ་ཕེབས་པའི་དགོངས་པ་བསྟད། ཞ་ལུ་རི་ཕུག་ནས་རྩེ་གདོང་དུ་ཕེབས་ཞབས་དྲུང་ཁྲི་རིན་པོ་ཆེ་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན་དཔལ་བཟང་པོའི་ཕྱག་ཕྱི་མཛད་ཤུ་གུ་ལ་བརྒྱུད་པཎྜི་ཏ་ཆེན་པོ་ཀཱ་མ་ལ་ཤཱི་ལའི་རྣམ་འཕྲུལ་རོང་སྟོན་ཤེས་བྱ་ཀུན་རིག་གི་གདན་ས་རྒྱུན་སྟེར་རམ་འདམ་བུ་སྦྱིན་དུ་འབོད་པའི་ཆོས་གྲ་ཆེན་པོར་བྱོན། རྩེ་གདོང་ཁྲི་རིན་པོ་ཆེར་ཚེ་དཔག་མེད་གྲུབ་རྒྱལ་ལུགས་ཀྱི་དབང་གསན། ཞབས་དྲུང་ཁྲི་ཆེན་གྱིས་ནཱ་ལནྡཱའི་མཁན་ཚབ་ཏུ་མངའ་གསོལ་ཏེ་རེ་ཞིག་བཞུགས་དུས་ཁམས་བོད་ཀྱི་གྲ་པ་རྣམས་ལ་རྒྱུད་སྡེ་བཞིའི་ནང་ནས་དབང་རྗེས་གནང་ཉམས་འཁྲིད་དང་ལུང་ཅི་རིགས་ཀྱི་ཆོས་ཆར་ཕབ། རྗེ་བཙུན་ནཱ་རོ་མཁའ་སྤྱོད་མའི་སྐུའི་སྣང་བ་ཆེས་གསལ་བར་བྱུང་བ་ཚར་ཆེན་ལ་འཕན་དཀར་གྱི་ལྗོངས་སུ་རྗེས་སུ་འཛིན། ཞེས་པ་དང་དབྱིབས་མཚུངས་པའི་ནཱ་རོ་ཏ་པའི་སློབ་བཤད་ཟབ་མོ་ཐུགས་ཉམས་སུ་བསྟར་བ་འགའ་ཞིག་ཡུལ་ཕྱོགས་འདི་ངོས་ནས་རྗེས་སུ་འཛིན་པའི་རྟེན་འབྲེལ་ཞིག་ཡོད་པར་མཆིས།