[A:༤༢༦]ཀི་ཐ་མལ་ཚུལ། །བསྟན་ནས་ཚིག་དང་བརྡ་ཡིས་རྗེས་སུ་བཟུང༌། །ཨྱོན་ཐུགས་ཀྱི་ཐིགས་པ་རོ་བདའི་ཟས། །ལྷ་གཅིག་སྲས་དང་མཚུངས་པར་ལོངས་སྤྱོད་པའི། །ལས་སྨོན་རྟེན་ཅིང་འབྲེལ་འབྱུང་ལྡེ་མིག་དེས། །མཆོག་ཐུན་བཞེད་དགུ་ཚང་བའི་སྒྲོམ་བུ་ཕྱེ། །དབུ་རུའི་ཕྱོགས་འདིར་མཉམ་མེད་ཁའུ་པའི། །བསྟན་པའི་གདུགས་དཀར་བསྒྲེང་མཁས་བོད་མཁར་རྗེའི། །རྒྱལ་ཚབ་མི་ཕམ་ཆོས་ཀྱི་རྒྱ་མཚོ་དང༌། །ཐུགས་ཡིད་གཅིག་འདྲེས་སྲས་ཀྱི་ཐུ་བོར་གྱུར། །ཁྲག་དྲོན་འཛག་པའི་གཡང་གཞི་ལྡིང་ཐབས་གྱོན། །དོན་སྙིང་ཟ་ཞིང་རྒྱུ་མའི་ག་ཤ་ཅན། །མི་སྡུག་གཤིན་རྗེའི་སྡེ་དཔོན་མིང་སྲིང་རྣམས། །ཅི་བགྱིའི་ལས་བཅོལ་གཡར་དམ་སླར་བཅས་འདྲ། །དེ་ནས་རིམ་བཞིན་གཙང་ལ་ཆིབས་བསྐྱོད་པའི་ལམ་ཞོར་དུ་པཎ་ཆེན་ཤཱཀྱ་ཤྲཱིས་དབྱར་གནས་མཛད་ཅིང་བྱིན་གྱིས་བརླབས་པའི་དྲང་སྲོང་སྲིན་པོ་རིར་ཕེབས་ནས་པཎ་ཆུང་བི་བྷཱུ་ཏི་ཙནྡྲའི་ཕྱག་བཟོའི་བདེ་མཆོག་བྱིན་རླབས་ཅན་མཇལ་ཞིང་སྨོན་ལམ་གནང༌། གོང་དཀར་ཆོས་སྡེའི་ཀླུ་དབང་གླིང་དུ་བཞུགས་པའི་ནུབ་ཨོཾ་གསུམ་མའི་སྒྲ་དིར་དིར་སྒྲོགས་བྱུང་བས་རྐྱེན་བྱས་གྱང་ལྡེབས་ལ་རྗེ་བཙུན་ནཱ་རོ་མཁའ་སྤྱོད་མའི་སྐུ་རི་མོར་བྲིས་པ་ཤིན་ཏུ་གསལ་བ་གཟིགས་པ་སྐུ་འཁོར་བ་ཞིག་གིས་འདི་ཐམས་ཅད་མཁྱེན་པའི་ཕྱག་བྲིས་ཡིན་ཟེར་བའི་ཐུགས་སྣང་ལ་ཤར་བ་ནང་པར་ལོགས་དེར་ཅི་ཡང་མི་འདུག་པ་ཉེ་ལམ་འདི་ལ་བརྟེན་ནས་རྒྱ་བོད་ཀྱི་གྲུབ་བརྙེས་དུ་མ་ལུས་མ་སྤངས་པར་མཁའ་སྤྱོད་དུ་བྱོན་པའི་ལོ་རྒྱུས། ལམ་གླུ་དཔྱིད་ཀྱི་རྒྱལ་མོའི་གླུ་དབྱངས་ལས། དཔལ་མཁའ་སྤྱོད་ཀྱི་དགའ་མ་ཡིད་