[A:༤༢༧]འོང་མ། །དུས་རིང་ནས་བསྐྱངས་པའི་མ་མ་དེས། །ད་རིག་འཛིན་གྱི་གྲུབ་པ་སྟེར་བའི་བརྡ། །ཞེས་པ་དང་མཚུངས་པར་མངོན། གམ་པ་ལ་བརྒྱུད་མ་ཕམ་མགོན་པོ་ཀུན་མཁྱེན་བུ་སྟོན་ཞབས་ཀྱི་དབེན་གནས་ཞ་ལུ་རི་ཕུག་ཆོས་ཀྱི་ཕོ་བྲང་དུ་ཕེབས་ཏེ་བཞུགས་མུ་ནས་ས་ཁྱི་ལོར་གནུབས་ཆོས་ལུང་དུ་ཨཥྟའི་བསྙེན་ཆེན་གནང་སྐབས་དཔལ་ཀྱེ་རྡོ་རྗེ་ལྷ་དགུའི་རྟེན་བརྟེན་པ་ཐོག་ཚད་ཙམ་གཟིགས་པ་ནི། ཚར་ཆེན་གྱི་གསུང་མགུར་དུ། དཔལ་བདེ་མཆོག་འཁོར་ལོ་རྣལ་འབྱོར་མ། །ལྷ་དགྱེས་པ་རྡོ་རྗེ་རིམ་བཞིན་དུ། །ཁྱོད་བྱང་ཆུབ་སྒྲུབ་པའི་ཡི་དམ་གྱིས། །ཞེས་གསུངས་པའི་དོན་ལྟར་ཟུང་འཇུག་མངོན་དུ་མ་གྱུར་གྱི་བར་དུ་རྗེས་སུ་འཛིན་པའི་བརྡར་མཆིས། གྱང་ཤིང་ལྟ་བུ་ཞིག་གི་སྟེང་ན་རྗེ་བཙུན་དཀར་པོ་རྣམ་གསུམ་བཞུགས་པ་སྐུ་དངས་ཤིང་གསལ་བ་འོད་ཀྱི་རང་བཞིན་ལ་རྗེས་སུ་སྐུ་རྣམས་ཅུང་ཟད་འཁྱོགས་པའི་རྣམ་པ་མནལ་མལ་དུ་གསལ་བར་ཤར་ཞིང༌། ལྗགས་བསྙེན་བཅུ་ཆའི་སྦྱིན་སྲེག་སོགས་ཚང་བར་གྲུབ་ནས་བཀའ་བརྒྱད་ཡོངས་རྫོགས་ཀྱི་ཞལ་གཟིགས་ཤིང་དེ་ནས་བཟུང་སྔགས་སྒྲུབ་ནར་མར་མཛད། དབལ་ཕུག་ཏུ་བྱོན་པའི་ནུབ་མནལ་ལམ་གྱི་ཚུལ་དུ་ཚར་ཆེན་ཆོས་ཀྱི་རྒྱལ་པོས་གསུང་ངག་གི་དབང་བྱིན་རླབས་ཁྲིད་མན་ངག་ཐམས་ཅད་གནང་བའི་ཉམས་ཤར་བ་ནི་རྗེ་བརྩེ་བ་ཆེན་པོར་རྣལ་འབྱོར་དབང་ཕྱུག་པི་རཱུ་པས་རྒྱབ་རི་དང་མཉམ་པའི་སྐུ་དངོས་སུ་བསྟན་ཏེ་གསུང་ངག་ལམ་འབྲས་རྫོགས་པར་གནང་བ་དང་ཤར་ཆེན་གྱིས་མནལ་ལམ་བཟུང་ནས་སྤྲོས་མེད་གསན་པའི་ལོ་རྒྱུས་དང་དབྱིབས་མཚུངས་པས་མནལ་ལམ་གྱི་ཟོལ་ལས་མངོན་