[A:༣༩༡]ངོས་སུ། རབ་འབྱམས་ཤེས་བྱའི་ཚོན་རིས་ཀུན་ཤར་བས། །གྲགས་མིན་དོན་དང་ལྡན་པའི་ཐམས་ཅད་མཁྱེན། །ཆེད་དུ་བཅོས་མའི་གཞན་འབྲིད་ལྷུར་ལེན་དང༌། །ཞིག་པོའི་རྩིང་སྤྱོད་མཐའ་གཉིས་དང་བྲལ་བ། །ཚུལ་ཁྲིམས་དབུ་མར་རྣམ་དག་བག་ཡོད་ཀྱི། །ནམ་ཡང་ལྷོད་མེད་བཙུན་པའི་རྩེ་མོར་སོན། །གཉེན་ཆགས་གཅན་གཟན་ལུགས་ལ་བྱང་སེམས་སུ། །མི་རློམ་ལུས་ཅན་ཀུན་ལ་རྟག་སྙོམས་པས། །གཅིག་ཏུ་ཕན་པ་སྒྲུབ་པའི་ལྷག་བསམ་ཐུགས། །རྡུལ་བྲལ་སྟོན་ཟླ་ལྟར་དཀར་བཟང་པོའི་དཔྱིད། །ཨ་ཧོ་ཕྱི་རོལ་ཉན་ཐོས་བསླབ་པས་མཛེས། །ནང་དུ་རླབས་ཆེན་སྤྱོད་མཛད་རྒྱལ་བའི་སྲས། །གསང་བ་བཅུ་གསུམ་རྡོ་རྗེའི་སར་གཤེགས་པའི། །རྟོགས་བརྗོད་སྨྲ་ལ་འཇིག་རྟེན་མེས་པོ་ངལ། །འོན་ཏེ་ཐུན་མོང་གདུལ་བྱའི་བསམ་པ་ཁམས། །དབང་པོ་འཚམས་པའི་རྣམ་ཐར་གངྒཱའི་ཀླུང༌། །རྡུལ་ལས་སོར་མོའི་རྩེ་ཡིས་བླངས་པ་ཙམ། །