[A:༤༢༨]སུམ་དུ་རྗེས་སུ་བཟུང་ནས་ཞག་ཤས་ཀྱི་བར་མ་གནང་བའི་ངེས་པ་མི་འདུག་གོ །དེ་ནས་རི་ཕུག་ཏུ་ཕེབས་འདི་ལོ་ཧོར་ཟླ་བཅུ་གཉིས་པའི་ཉེར་ལྔ་ལ་མཁན་ཆེན་གཞོན་ནུ་བློ་གྲོས་གཟུགས་སྐུ་ཆོས་དབྱིངས་སུ་བསྡུས་པའི་ཚེ་འདར་དུ་ཚར་པ་རྡོ་རྗེ་འཆང་གི་གསེར་གདུང་སྐུ་དྲུང་དུ་མར་མེ་རྒྱུན་སྦར། ཁའུ་པའི་བསྟན་འཛིན་རྣམས་ལ་ཐུགས་དམ་འདོགས་རྟེན། དགོན་པ་ཚོར་མང་འགྱེད་བཅས་འབྱོར་པའི་ངག་མར་བསྟན་འཛིན་རྣམས་ཀྱི་བགྲེས་ཁར་སོང་གཤིས་རིན་པོ་ཆེ་དགོན་གསར་པ་ཡར་ཀླུངས་སུ་ཕེབས་ཐུབ་ལ་རེའི་སྙན་གསན་བྱུང་བའི་ལན་དུ་ན་སོ་སྨིན་པ་དང་ས་ཁད་འགྱངས་པར་བརྟེན་ཕན་ཐོགས་ཡོང་བ་དཀའ། དེ་བས་བསྟན་པའི་ཉི་མ་ཨྱོན་གཉིས་པ་དབོན་དྲུང་མཁྱེན་རབ་གདུལ་བྱའི་མཁའ་ལ་བྱིན་རླབས་ཀྱི་འོད་ཟེར་འབུམ་ཕྲག་འགྱེད་ནུས་པའི་སྔགས་འཆང་དབང་ཕྱུག་རབ་བརྟན་སྤྱན་འདྲེན་པར་འོས་སོ་ཞེས་པ་ཕུལ། དེ་ལྟར་དང་ལེན་མཛད་སོང་བས་དེ་ཕྱོགས་ཀྱི་རེ་འདོད་ཐམས་ཅད་འགྲུབ་པར་གོ་བས་བློ་བདེ། ཞེས་གསུངས་པར་གནང་ཞིང་རིན་པོ་ཆེ་ཡོལ་བ་པ་རང་གིས་སྔར་ནས་ཐུགས་རྩེ་བསྟད་པའི་ཞལ་ཆེམས་ལ་ཆོས་སྡེ་འདི་གསར་པར་སོང་གཤིས་མཁན་ཐོག་ཏུ་གནས་གསར་རྗེ་དྲུང་གདན་འདྲེན་ཐུབ་པ་ཅིས་ཀྱང་གྱིས་ཞེས་སྡེ་པ་དངོས་གྲུབ་པ་དང་གྲ་རིགས་རྣམས་ལ་གསུང་གི་ཐ་མ་སྩལ་བ་དང་མཐུན་པ་བྱུང་བ་ལྟར་ས་ཕག་ནང་དུ་ཡོན་མཆོད་ཐུན་མོང་ནས་གདན་འདྲེན་གྱི་སྙན་གསན་འབུལ་མི་མངགས་པ་ཞ་ལུར་འབྱོར་རྒྱུའི་ཞག་ལྔ་ཙམ་གྱི་གོང་ནུབ་ཅིག་མནལ་ལམ་དུ་ཨཱ་ཙརྻ་གཟི་བརྗིད་ཅན་རྒྱ་དང་སྨ་ར་བཟང་པོ་གོས་གསེར་མ་དཀར་