[A:༤༣༥]བདག་ཞ་ལུ་པ་ཆེན་པོ་འཁྲུངས་པར་རྒྱལ་གདོན་གྱིས་སྙུན་འདྲེ་བྱུང་བ་ལ་ཞག་བདུན་ཐོག་ཏུ་རྗེ་ཉིད་གདན་དྲངས་ཏེ་རྟ་མགྲིན་གསང་སྒྲུབ་ཀྱི་བྱིན་རླབས་དང་དབུ་སྐྲ་བུབས་ཀྱི་མགུལ་སྲུང་གནང་བར་བརྟེན་སྐུ་ཁམས་ཤིན་ཏུ་བདེ་བས། དེ་སྐབས་བར་ཆད་ཀྱིས་མི་ཚུགས་པ་དམ་པ་འདི་ཉིད་ཀྱི་བཀའ་དྲིན་ཡིན་ཞེས་ཡང་ཡང་གསུང་ཞིང་སྐུ་ན་ཚོད་ཕྲ་མོ་དེ་ཉིད་ནས་བརྩེ་བ་ཆེན་པོས་འཛིན་པ་འཇམ་དབྱངས་བྱང་གླིང་བཀྲ་ཤིས་རྒྱལ་མཚན་གྱི་རྣམ་པར་སྤྲུལ་པ་འདི་ཉིད་ཀུན་མཁྱེན་བུ་དང་ཁའུ་པའི་བསྟན་འཛིན་ཆེན་པོ་ཞིག་འོང་བ་དགོངས་པར་གོར་མ་ཆག །དགུང་ལོ་བཅུ་ཙམ་ནས་བཟུང་རི་ཕུག་ཏུ་བཞུགས་སྐབས་ཡང་ཡང་མཇལ་བའི་གསུང་ཆོས་ཀྱང་ཆེད་དུ་གསན་པ་དང་ཞར་ཆོས་སོགས་ཁ་ཤས་གསན། ཧོར་ཟླ་བདུན་པའི་ནང་དུ་རིན་པོ་ཆེ་ལྟ་ར་བ་འདར་རྫོང་དུ་བཞུགས་པ་དང་མཇལ། རྡོ་རྗེ་ནག་པོ་ཞལ་བཞི་པའི་གསང་བའི་ཉམས་ཁྲིད་ཤིན་ཏུ་ཟབ་པའི་སྐོར་རྣམས་སྨིན་རྒྱས་སུ་གསན་ཅིང་དགྱེས་པའི་གསུང་གླེང་མང་དུ་སྩལ། ཆུ་ཡོས་ཀྱི་ལོ་འཇམ་དཔལ་དབྱངས་བྱང་གླིང་པ་བཀྲ་ཤིས་རྒྱལ་མཚན་གྱི་བཞུགས་ཁྲི་རི་ཕུག་གི་གདན་ས་གནང་བའི་མཆོག་དམན་མང་པོར་ཆོས་ཀྱི་འཁོར་ལོ་བསྐོར་ཞིང་སྐུ་མཚམས་དམ་པོའི་ངང་ནས་སྤྲོས་བཅས་སྤྲོས་མེད་ཀྱི་རྣལ་འབྱོར་ལ་གཞོལ། ཤིང་ཕོ་འབྲུག་གི་ལོ་འོད་གསལ་ལ་ལུང་པ་འདི་ཡིན་ཞེས་ངོས་བཟུང་དུ་མེད་པའི་རི་སུལ་ཞིག་ནས་རིག་འཛིན་མངའ་རིས་པ་ཆེན་པོ་ལེགས་ལྡན་རྡོ་རྗེ་ཕེབས་པ་ཡིན་ཟེར་བའི་རྟ་པ་མང་པོ་བྱུང་བའི་རྗེས་སུ་བླ་མ་རིན་པོ་ཆེ་བསོད་ནམས་ཆོས་འཕེལ་ཡང་ཕྱག་ན་ཚེ་རིལ་མང་པོ་བསྣམས་པ་ནས་འགའ་ཞིག་གནང་བ་ནི་དེ་སྐབས་རིན་པོ་ཆེ་དགོན་གསར་