[A:༤༣༨]གླིང་ཆོས་རྗེའི་རྒྱལ་སྲིད་བཟུང༌། །བཀའ་དྲིན་མཚུངས་མེད་རྗེ་བཙུན་དགོན་གསར་པའི། །ཡེ་ཤེས་དག་པའི་རང་ཞལ་མངོན་སུམ་བསྟན། །ཤིང་སྦྲུལ་ལོ་དབྱར་གྱི་ནམ་ཟླ་ཤིན་ཏུ་གཉན་པའི་དུས་རྨང་ལམ་དུ་འ་ཞ་གསང་བདག་ནམ་མཁའ་རྡོ་རྗེ་རལ་གུ་དང་སྐུ་གཟན་སྨུག་པོ་བཞེས་པ་ཕྱག་གཡོན་པར་རག་འཕྲེང་སྡིགས་མཛུབ་དང་བཅས་པའི་སྟང་སྟབས་ཀྱིས་ལྷོ་ནུབ་ཀྱི་ཕྱོགས་བསྲུང་བ་ཞིག་བྱུང་འདུག་པ། བཀའ་ལས། འདི་ཡང་ངེད་རང་གི་དོགས་པ་ཡོད་པའི་ཕྱོགས་ཀྱི་བར་ཆད་དང༌། སེར་བ་འཆོར་བའི་ཉེན་ཁམ་ཅན་ཡོད་འདུག་པ་བསྲུང་བ་མཛད་པ་འདྲ་ཞེས་པ་འཁོར་རྣམས་ལ་སྩལ། སྐབས་ཤིག་མནལ་ལམ་དུ་ཨཱ་ཙརྻ་མདོག་སྔོ་བསང་ངེ་བ་ཞིག་དང་ལྷན་ཅིག་པར་རྒྱལ་པོ་ཆེན་པོ་རྣམ་ཐོས་སྲས་སེར་ཆེན་གྱི་སྐུ་ཤིང་ལ་བྲིས་པ་ལྟ་བུའི་སྣུམ་བག་ཅན་གསལ་བར་གཟིགས་གསུང་བ་དོན་དུ་རྒྱལ་ཆེན་འདི་ཉིད་ཤིན་ཏུ་འགོ་བས་ཞལ་གཟིགས་པར་མངོན། བཀྲ་ཤིས་རྩེ་མཆོད་ཡོན་ནས་གདན་འདྲེན་བྱུང་བ་ལྟར་ཡར་ཀླུངས་སུ་ཕེབས་ཏེ་ཕྱོགས་དེའི་སྐྱེ་རྒུ་རྣམས་བསྡུ་བའི་དངོས་པོ་བཞིའི་སྒོ་ནས་གང་ལ་གང་འཚམ་གྱིས་རེ་བ་བཀང༌། བུ་སྟོན་རིན་པོ་ཆེའི་རྣམ་ཐར་སྙིམ་པའི་མེ་ཏོག་ལས། ང་ཆོས་བཤད་པའི་སློབ་དཔོན་ཡིན་མོད་བྱས་ན་དམ་ཚིག་ལ་ནོར་ལ་མ་འཆམ་པའི་བར་མི་བཞིན་སྤོ་བགོས་གཏོང༌། རང་གི་བློ་དང་མི་མཐུན་ན་བླ་མ་ཡིན་ཀྱང་ཁྱི་སྨྱོན་འདེད་པའི་དམག་མི་ལྟར་རྡོ་ཆར་བྱེད། ཅེས་པའི་དོན་ཐོག་ཏུ་བབས་ཏེ་ཞ་ལུ་བ་རྩིང་པོར་སྤྱོད་པ་འགའི་ཁ་དབང་དུ་སོང་ནས་སྐོར་ལོང་ཙམ་ཡང་མེད་པར་བླ་མ་དཀའ་བཞི་པ་བརྒྱུད་གཞིས་ཀ་རྩེར་ཞུས་པའི་དཔོན་ཆེན་རྒྱལ་མཚན་བཟང་པོ་རི་ཕུག་དབུ་མཛད་དུ་བཙན་བསྐོས་གནང་བའི་མ་མཛེས་