[A:༤༤༠]པོ་ལ་མཉམ་མེད་བསམ་གཏན་གླིང་པའི་ཡང་ཟབ་ཨ་ཏིའི་སྐོར་རྫོགས་པར་གསན་ཅིང་རྗེས་སུ་བཞི་ཐོག་ཏུ་བདག་ཆེན་ཁྲི་རིན་པོ་ཆེར་འབུལ་བ་གནང་བས་ཟབ་ཆོས་འདི་ཉིད་སྲིད་མཐར་མི་ཉམས་པའི་བསྟན་བའི་སྲོག་ཏུ་སོང༌། དེའང་ཐང་ཡིག་ཏུ། ཁྱད་པར་ཡར་ཀླུངས་ཤེལ་གྱི་བྲག་ཕུག་འདི༔ བདུད་རྩི་སྨན་སྒྲུབ་བྱས་པའི་གནས་ཡིན་པས༔ གསང་སྔགས་མཐར་ཕྱིན་ཨྱོན་ཡུལ་ལྟ་བུ༔ ཡ་མཚན་སྒྲུབ་ཁང་བྲག་ཕུག་ཁྱད་འཕགས་ཡོད༔ ཞི་ཁྲོ་ལ་སོགས་གཞལ་ཡས་ཁང་མང་བཞུགས༔ བོད་འབངས་དགའ་དང་སྤྲོ་བར་འགྱུར་བའི་བྲག༔ ཡོན་ཏན་བརྒྱ་ལྡན་བསམ་ལས་འདས་པར་བརྗོད༔ དེ་ལ་གནས་ཚད་དུ་རུཥྐས་མི་ཕེབས༔ ཞེས་ཨྱོན་ཆེན་པོས་བོད་ཀྱི་གནས་ཆེན་གངས་བྲག་ཐམས་ཅད་བྱིན་གྱིས་བརླབས་ཏེ་སྒྲུབ་གནས་ཆེས་མང་པའི་ནང་ནས་ཁྱད་པར་དུ་འཕགས་པ་ཡོན་ཏན་གྱི་དབེན་གནས་ཡར་ཀླུངས་ཤེལ་གྱི་བྲག་ཕུག་ཏུ་དགུང་ལོ་ཞེས་བརྒྱད་པ་མེ་རྟ་ཧོར་ཟླ་བརྒྱད་པའི་མཇུག་ལ་ཐེགས་པའི་སྟ་གོན་གྱི་ཚེ་གཟིམས་ཁང་གི་ཐོག་ཏུ་ལྕོག་བུ་བྱས་བཞུགས་པའི་དུས་བྱུང་བའི་གོང་གི་གཟིགས་སྣང་དེ་ལས་ཆེ་བའི་ཨྱོན་རིན་པོ་ཆེ་ཟ་ཧོར་མའི་སྐུ་འཇའ་འོད་ཀྱི་ཀློང་ན་ཁྲ་ལམ་མེར་བཞུགས་པ་ཞིག་ཤིན་ཏུ་གསལ་བར་འོད་གསལ་ལ་ཤར་ཞིང་གནམ་གང་གི་ཐོ་རེངས་ཨྱོན་ཆེན་པོ་གོང་ལྟར་གཟིགས་པ་ལས་འཕྲོས་པའི་བཅོམ་ལྡན་འདས་འཁོར་ལོ་སྡོམ་པ་ཨིནྡྲ་ནཱི་ལའི་མདོག་ལྟར་གསལ་ལ་འཚེར་བ་སོགས་ངོ་མཚར་བའི་སྣང་བ་འབྱམས་ཀླས་པ་མང་བར་གཟིགས། ཧོར་ཟླ་དགུ་པའི་ཚེས་གཉིས་ལ་དཔོན་སློབ་དམ་ཚིག་གཙང་བ་ཁ་ཤས་དང་བཅས་ཐེགས་པའི་དུས་ནམ་མཁའ་འཇམ་ཞིང་ཐུགས་ལ་སྔར་མེད་པའི་བདེ་ཉམས་ཆེན་པོ་དགའ་