[A:༤༤༢]ཟླ་བཅུ་གཉིས་པའི་ཚེས་བཅུའི་ཐོར་ཐུན་གྲོལ་འཚམས་མནལ་ལ་ཅུང་ཟད་སོང་བའི་ཚེ་སློབ་དཔོན་ཆེན་པོའི་སྐུའི་སྣང་བ་ཆུ་ལས་ཆུ་ལྦུར་ཤར་བ་ལྟར་སྔ་མ་འགགས་པ་དང་ཕྱི་མ་གསལ་བ་ཁ་ཡར་བྱུང༌། ཁྲ་འཕྲུག་གི་གནས་མཇལ་ལ་བྱོན་ཏེ་སྨོན་ལམ་རྒྱས་པར་འདེབས་པ་གནང་བའི་ནུབ་རྨང་ལམ་གྱི་ཚུལ་དུ་བླ་མ་མཚོ་སྐྱེས་རྡོ་རྗེ་སྐུའི་སྣང་བརྙན་ཁྲ་ལམ་གྱིས་ཤར་ཞིང་ཤེལ་བྲག་གི་རི་ངོས་མཐའ་དག་སངས་རྒྱས་བྱང་ཆུབ་སེམས་དཔའི་སྐུས་ཁྱབ་པ་དང་མངོན་སུམ་དུ་བཞུགས་ཡོད་དགོངས་པའི་གདུང་ཤུགས་ལྷང་ལྷང་པའི་ངང་ནས་མནལ་སད། མེ་ལུག་ཧོར་ཟླ་དགུ་པའི་ཉེར་བཞི་ལ་ཆོས་སྡེ་ནས་སང་ཐེགས་རྒྱུའི་ནུབ་འོད་གསལ་ལ་རྗེ་ཉིད་སློབ་དཔོན་ཆེན་པོ་པདྨའི་སྐུའི་དབྱིབས་ཅན་དབུས་དང་ཕྱོགས་བཞིར་རེ་རེ་སྟེ་ལྔ་རྣམས་ཆེ་ཆུང་མི་ཚད་ཙམ་སོ་སོར་བཀྲག་མདངས་དང་ལྡན་པའི་འཇའ་ཚོན་ལྔའི་གུར་ཁྱིམ་ཡོད་པའི་རྣམ་པ་ནི་ཐུགས་རིགས་པའི་ངོ་བོ་དོན་གྱི་པདྨ་འབྱུང་གནས་གཅིག་ཉིད་ལས་ཐོད་འཕྲེང་རིགས་ལྔར་ཤར་བ་ཡེ་ཤེས་ལྔའི་གདངས་འགག་མེད་དུ་འཁུམས། ཉེར་ལྔ་ཚེས་བཅུའི་མཆོད་པ་ཤེལ་བྲག་ཏུ་གནང་ནས་ཞག་གསུམ་གྱི་བར་བཞུགས་རིང་རིག་འཛིན་བླ་མའི་བསྙེན་སྒྲུབ་ལས་སྦྱོར་གྱི་འཕྲོ་འདུའི་དམིགས་པ་རྩོལ་བ་ལ་མ་ལྟོས་པར་འབད་མེད་དུ་ངང་གི་ཤར་བ་ཐེངས་གཉིས་དང་གནས་ཀྱི་རི་བྲག་ཀུན་དང་ཁྱད་པར་གུ་རུ་ཕུག་པའི་བྲག་གདོང་ཐམས་ཅད་ཨྱོན་ཞི་ཁྲོ་སོགས་མདོར་ན་སྲས་བཅས་རྒྱལ་བའི་སྐུའི་སྣང་བ་འབའ་ཞིག་ཏུ་ཤར་བ་གང་ཟག་ཁྱད་པར་ཅན་རྣམས་ལ་དུས་ཐམས་ཅད་དུ་དག་པའི་སྣང་བ་ཤ་སྟག་འབྱུང་བས་འདི་ཙམ་ལ་ངོ་མཚར་དུ་འཛིན་པ་གཅིག་ཏུ་མ་འོས་ནའང་